A Rede non sempre é unha Rede. Ás veces, cando se impón sobre calquera outra cousa o peso do estritamente dirixido á maioría, aparéceselle ás minorías coma o seu contrario: unha estrada sen acceso nin saída. Isto non é aplicable á web galega da que imos falar de contado, unha páxina posta en marcha polo grupo TADEGA e que se sitúa a medio camiño entre un conto virtual e un foro de experiencias arredor dese conto e da accesibilidade dixital mesma. Falamos da proposta Contos de Xandre, un sitio en liña que baixo o epígrafe Xandre, o elefante sen sombra diríxese a pór de manifesto entre a comunidade internauta a seguinte realidade: non todos os seus usuarios están na mesma disposición para facer uso igualitario dos seus servizos, propostas e equipamentos. Porén, e para que se entenda, os Contos de Xandre si que o está, de aí que todo o que aparece nela, o conto en si mesmo, sexa cen por cen adaptado e accesible para nenas e nenos con diversidade funcional. De feito, dispón de braille, lingua de sinais, pictogramas, audios, vídeos e outras canles e formatos.

A Dirección Xeral de Xuventude e Voluntariado da Xunta está a organizar entre os estudantes de ESO e Bacharelato do noso país a primeira edición do Parlamento Xove, unha iniciativa que pretende “potenciar o diálogo como ferramenta de ideas propias entre a mocidade galega”, e que, a través do debate, vai por sobre o taboleiro a dualidade do uso das redes sociais por parte dos menores.
Trátase dunha competición entre centros de ensino da Comunidade na que os participantes deberán integrarse en diversos equipos para investigar, escribir e debater sobre o tema proposto pola organización, que nesta ocasión será se o uso das redes sociais separa ou une á mocidade.
Así, a iniciativa dividirase en dúas fases. Unha inicial de investigación e argumentación de ideas e outra final no que terá lugar o debate dialéctico en galego. Así, o obxectivo principal da actividade é que os estudantes poidan amosar as súas habilidades a nivel persoal e de grupo na selección de información, na expresión escrita e oral, na creatividade e no traballo en equipo.
O calendario de actividades será o seguinte: ata o 15 de febreiro os interesados poderán inscribirse na actuación; do 15 a 28 de febreiro terá lugar a entrega dos artigos; do 1 ao 15 de marzo deberá estar feito o dossier; o 26 de marzo Xuventude anunciará os equipos que pasarán á fase do debate que se celebrará o 24 de abril.

Tras o anuncio do iPad, varios son os fabricantes que preparan accesorios para o mesmo, entre o que os primeiros serán sen dúbidas as fundas para protexelo, pero resulta curioso ver que dende LaCie, en vez de preparar unha liña de produtos específica para o novo trebello de Apple, simplemente decatáronse de que as súas dimensións coincidían bastante coas dos ultraportátiles de 10,2 polgadas, de xeito que advirten que as súas fundas LaCie Coat e LaCie ForMoa, con prezos de 17,90 e 23,90 euros respectivamente, serven perfectamente para acoller un iPad no seu interior, podendo optarse en ambos casos por un abano de cinco cores para elixir.