A Biblioteca Central do Campus de Vigo procura a identidade dixital para os investigadores
xoves, 23 de xuño do 2016
A Biblioteca
Central do Campus de Vigo quere dotar ao persoal investigador da
súa contorna dunha identidade dixital. Segundo fai saber a
dirección, entre as principais vantaxes que achegará esta
acreditación para os investigadores figura a de poder seren
identificados e promocionar a súa produción científica. Estes
datos foron achegados por Héctor Castro, técnico da Biblioteca
Central, no obradoiro convocado para achegar ao persoal especializado
do Campus á creación dun perfil identificador na Rede. O
obradoiro, de natureza práctica, acolleu 30 docentes e
investigadores na Facultade de Ciencias Sociais e da Comunicación e
céntrase máis polo miúdo no sistema ORCID,
entidade sen arela de lucro que se dirixe a dar forma a un rexistro
universal de investigadores.
A actividade, impartida
por Héctor Castro e Laura Fernández (directora da Biblioteca
Central), desenvolveuse por vez primeira no Campus baixo o seguinte
epígrafe: Creación e xestión do perfil investigador. O
seu gran obxectivo, como dixemos, foi botar luz (en compaña dos
investigadores) nas posibilidades que se abren cun sistema
tecnolóxico que a través de códigos numéricos permiten ligar un
termo identificador cunha produción científica concreta: xuntando
todo nun mesmo perfil e abranguendo información biográfica,
curricular e académica. A idea, sinálase, “é contribuír a
visualizar a produción científica e, tamén, aumentar a
visibilidade da institución á que pertencen as investigadoras e
investigadores”.
Os contidos do obradoiro,
que se desenvolveron en tres sesións este mércores, abranguen tamén
a análise doutras iniciativas de identificación, así como das
pautas fixadas pola FECYT (Fundación Española para a Ciencia e a
Tecnología) para a normalización da súa sinatura científica, de
tal xeito que permitan “que as súas publicacións sexan
localizábeis de maneira doada nas bases de datos”.