A CEL e o Centro Tecnolóxico da Información impulsarán as TIC entre as empresas lucenses
xoves, 22 de xaneiro do 2015
A Confederación de
Empresarios de Lugo (CEL) e a Fundación CTIC Centro Tecnolóxico da
Información e a Comunicación asinaron este xoves 22 un
acordo de colaboración co obxectivo de desenvolver accións
conxuntas no eido da innovación e as novas tecnoloxías da
información. Estas actividades irían destinadas a beneficiar ás
PEME e ás microempresas de Lugo e provincia. Na formalización do
acordo participaron Jaime López, secretario xeral da CEL, e Pablo
Priesca, director xeral de CTIC. Lembrar que esta última é unha
entidade creada en 2003 e con sede en Xixón. O seu cometido é
achegar coñecemento e experiencia para o desenvolvemento de
programas de asesoramento e apoio ás empresas. Mediante a dita
alianza, o CTIC xunta a súa bagaxe no ámbito empresarial á
experiencia análoga da CEL, aplicábel neste caso a Lugo e
provincia.
Máis polo miúdo, o que
se busca é “impulsar a mellora competitiva das empresas de Lugo a
través da incorporación do TIC e posta en marcha de procesos de
innovación”. Entre as posíbeis actividades a realizar atópanse
as seguintes: o apoio específico ás empresas lucenses na adopción
de TIC, o desenvolvemento conxunto de programas de divulgación en
innovación tecnolóxica, o desenvolvemento de iniciativas de fomento
do emprendemento de carácter innovador e empresas de base
tecnolóxica ou o fomento da I+D+i entre as empresas, entre outras.
Jaime López, sinalou
salientou na sinatura “a oportunidade que supón unha maior
colaboración e proximidade cos empresarios e institucións
asturianas, cos que a provincia de Lugo ten fortes ligazóns e
intereses coincidentes”. Lembrou igualmente que Asturias é “unha
saída natural para os produtos de Lugo (a través polo momento da
Autovía do Cantábrico)”, pero tamén unha “comunidade irmá”
en cultura e características do tecido empresarial, e subliñou o
peso da Fundación CTIC como entidade “cunha traxectoria de
traballo intimamente ligada non só ás novas tecnoloxías senón
tamén a importantes empresas asturianas, tanto grandes como moi
pequenas, e como oficina de referencia na xestión de fondos europeos
para desenvolvemento de proxectos de innovación e TIC en España”.
López manifestou tamén
que dende as empresas non se poden obviar datos como que o 32% da
poboación española merca xa por Internet, “unha cifra por baixo
da media da UE pero en ascenso”. De feito, engadiu, o comercio
electrónico rexistra taxas de medre anual que roldan o 15% e,
ademais, o 80% da poboación española é xa internauta, sendo a
metade dos usuarios da Rede usuarios (tamén) das comunidades
sociais.
Na súa opinión é de
urxencia impulsar a provincia de Lugo en materia TIC. Segundo fixo
saber, “existe na provincia un alto grao de fragmentación do
tecido empresarial e unha baixa cultura da adopción das novas
tecnoloxías polas PEME, especialmente no ámbito das microempresas,
como reflicten os datos estatísticos do INE”.