A Coruña presenta o seu programa de divulgación da cultura dixital
venres, 1 de xullo do 2016
Esta mañá o concelleiro de Culturas, Deporte e Coñecemento da
Coruña, José
Manuel Sande, presentou o programa municipal Coruña Dixital, “destinado a
expandir na cidade as novas prácticas culturais e creativas xurdidas a través
das dixitais”, atendendo así á emerxente demanda cultural dunha parte da
cidadanía que non só busca consumir produtos culturais, senón que, ante todo,
busca formar parte activa de contornas colaborativas, horizontais e abertas
onde se compartan os coñecementos e recursos precisos para facer e experimentar por si mesmas con novas ferramentas e procesos
creativos.
Esta iniciativa da área de Culturas e Coñecemento do Concello da Coruña vai
dirixida a persoas interesadas en compartir coñecemento arredor da creación e
as prácticas culturais baseadas na colaboración e no dixital, para as que
búscase facer máis accesibles estas prácticas.
Para coñecer de preto este proxecto podemos visitar a súa páxina web, baixo o dominio
corunadixital.gal, que nace para informar das actividades do programa e dar
visibilidade aos obxectivos, espazos e eventos da cidade relativos á cultura
dixital, completándose este espazo na web coa presenza en Facebook e Twitter. Cómpre destacar que,
aparte do galego e o español, a nova páxina web tamén conta con apartados e
inglés e portugués.
Adianto da programación municipal de outono
- O concelleiro de Culturas, José Manuel Sande, na presentación do programa Coruña Dixital, acompañado polo seu comisario, Sergio Lago.
Na presentación desta mañá o concelleiro avanzou
parte da programación municipal de outono, que principiará cun Encontro
Dixital o vindeiro 13 de setembro, o primeiro de Galicia con apoio
institucional, de axentes e colectivos que traballan arredor destas prácticas
de cultura dixital. Esta será a primeira actividade do programa, que permitirá
amosar unha panorámica de experiencias, seleccionando as especialmente as
distintas formas de traballo colectivo e implicadas coa realidade social máis
próxima. Sande recordou que, dentro de Galicia, A Coruña é un dos territorios
onde existen máis microcomunidades activas, en especial de colectivos maker e de programación.
O comisario do programa, o xestor cultural Sergio Lago, explicou que o programa
de actividades para o último trimestre do ano busca complementar a oferta
existente na cidade, "achegando novas visións e desenvolvendo procesos con
vocacións transformadora". Adiantou que entre outras actividades
desenvolverán o vídeo participativo Outras
Coruñas, un proceso audiovisual participativo ao servizo das novas
narrativas audiovisuais, que partirá de varios obradoiros para conformar un
proxecto colectivo desenvolvido desde a colaboración. O resultado será un webdoc colectivo. En outono chegará
tamén o Hackathon, un evento que reúne profesionais do deseño, a programación,
o cinema e artistas doutros perfís, enfocados nas novas posibilidades
narrativas da Internet.
Tamén se impartirá unha charla e obradoiro sobre realidade virtual en 360º,
tecnoloxía de gran actualidade nestes momentos, así como un encontro e
obradoiro sobre as oportunidades e ferramentas para abrir os repositorios
audiovisuais institucionais e comunitarios. Buscarase pór en valor o patrimonio
cultural material e inmaterial a través das novas tecnoloxías e o uso
audiovisual.
No bloque de actividades relativo a innovación social, tecnoloxía e novas
prácticas dixitais terá lugar un Ateneo Atlántico de Prototipado, lugar onde se
levará a cabo un laboratorio intensivo aberto no que persoas creadoras,
investigadoras e activistas xuntaranse nun clima de cooperación para compartir
coñecementos e desenvolver proxectos transdisciplinares. Tamén terá lugar un
obradoiro de ferramentas dixitais para o traballo colaborativo en rede dirixido
a axentes dinamizadores e colectivos sociais.