A Deputación da Coruña alenta o espírito innovador de máis de 70 emprendedores

A Deputación de Coruña organizou este xoves unha cita cos emprendedores da provincia para amosarlles xeitos e recursos para impulsar os seus proxectos de innovación. Na xuntanza participaron máis de 70 persoas. Tratouse dun curso incluído no programa europeo Startup Europe Week, destinado á formación e asesoramento en materia de novos proxectos. O encargado de abrir a xornada foi o presidente da entidade provincial, Valentín González Formoso, que alentou aos participantes na mesma, sobre todo xente nova, “a pór en marcha as súas ideas de negocio”. Para isto, dixo, contarán co apoio da Deputación.
O titular do Goberno provincial, xa nun plano máis concreto, tamén debullou algunhas das liñas fundamentais do Plan de Emprego que prepara a institución que representa, “que multiplicará por seis os recursos que viñamos destinando a esta área ata agora, e que abranguerá o apoio a iniciativas emprendedoras como un dos seus eixes principais”. E engadiu: “Queremos asesorar os proxectos, non só subvencionalos, porque os cartos públicos deben servir para cumprir un obxectivo e a Deputación debe servir de panca, non de freo”.
Na súa intervención citou exemplos de iniciativas empresariais coruñesas “que comezaron de xeito moi modesto e hoxe en día son líderes nos seus sectores ou desenvolven a súa actividade empresarial a nivel global”. Precisamente unha boa parte da xornada centrouse en amosar as orixes e o día a día de varias empresas arestora punteiras, como por exemplo ConfirmSign.com, IPGlobal, ou The Bio Factoy. Para explicar en detalle a actividade destas firmas participaron no curso Frankie Gómez, David Bello e Broder Fernández Obanza, responsábeis das devanditas empresas, respectivamente. Tamén interviñeron Víctor Salgado, do Bufete Pintos & Salgado, especializado en novas tecnoloxías da información e ciberseguridade, e máis representantes de Abanca, a Confederación de Empresarios, o IGAPE e a propia Deputación, quen orientaron aos asistentes sobre os recursos económicos e técnicos existentes para apoiar a creación de novos proxectos empresariais na provincia da Coruña.
Durante esta primeira semana de febreiro, diversos países europeos celebrarán máis de 200 actos dentro do programa Startup Europe Week, promovido pola Comisión Europea. O de onte será o único acto incluído nesta iniciativa que se desenvolverá na provincia da Coruña.