A Deputación de Pontevedra avanza na eAdministración co seu novo Boletín Oficial
mércores, 28 de xaneiro do 2015
- Formulario de solicitude de inserción de anuncios
O
pasado mes de decembro, a Deputación de Pontevedra puxo en marcha o
novo Boletín Oficial da Provincia de Pontevedra (en adiante BOPPO)
co dobre obxectivo de mellorar o proceso de publicación do boletín
e de prestar novos servizos aos cidadáns que o consultan a diario.
Coa posta en marcha desta iniciativa, a Deputación de Pontevedra
reafirma “o seu compromiso co impulso do uso das novas tecnoloxías
na administración pública como ferramenta chave para impulsar a
Administración Electrónica e con isto mellorar a eficiencia das
administracións”, informa o organismo provincial.
A
posta en marcha do novo BOPPO veu acompañada dunha simplificación
do procedemento de cara a conseguir optimizalo e con iso reducir os
tempos de publicación dos anuncios dende a súa recepción no
rexistro da Deputación de Pontevedra.
Unha
das principais simplificacións realizadas é relativa ao mecanismo
de remisión dos anuncios por parte dos diferentes anunciantes para a
súa publicación no boletín. Neste senso, habilitouse un novo
mecanismo de remisión de anuncios a
través da páxina Web do BOPPO. Esta páxina permite, a través
dun formulario, cumprimentar os datos do anuncio a publicar (datos do
anunciante, do pagador se procede o do propio anuncio) e xera un
xustificante en PDF cun código único de solicitude. Este
xustificante é remitido ademais á dirección de correo indicada
polo anunciante.
Unha
vez rexistrado o anuncio, a xestión da súa publicación realízase
a través do sistema de xestión de expedientes eDepo da institución
que garante una tramitación 100% electrónica eliminando o uso de
papel durante todo o proceso. A través deste sistema, os empregados
da Deputación de Pontevedra poden realizar o control do pagamento do
anuncio integrado co sistema de xestión de cargos posto en marcha
pola Deputación, planificar a súa publicación nunha data concreta
e realizar todos as labores de maquetado e publicación desatendida
do BOPPO.
- Ferramenta de xestión de expedientes eDepo
Para
a realización de todo o proceso de maquetado de anuncios, a solución
apóiase na ferramenta de edición Adobe InDesign que permite
automatizar de xeito parcial este proceso reducindo notablemente o
tempo empregado para esta tarefa.
O
sistema permite ademais realizar a sinatura electrónica dos anuncios
de forma desatendida, paso indispensable para dar ao BOPPO carácter
oficial e auténtico, e inclúe os mecanismos que garanten a
publicación do mesmo sen intervención humana.
Novo
formato de publicación
O
novo BOPPO inclúe ademais importantes cambios para adaptar esta
publicación aos novos tempos e optimizala para mellorar a súa
consulta a través de Internet.
Entre
os cambios mais significativos que se acometeron nesta nova versión
destaca o cambio estético aplicado na publicación de cara a
adaptala ao propio deseño do portal www.boppo.depo.es.
Ademais,
realizouse un cambio completo no formato de publicación usando
arquivos independentes en formato PDF e HTML para cada un dos
anuncios publicados co obxecto de facilitar a súa lectura sen ser
preciso descargar o BOPPO completo e facilitando a localización da
información publicada. Ademais, cada un dos anuncios en formato PDF
inclúen a sinatura electrónica, realizada co certificado do BOPPO,
e un selo de tempos. A utilización de ambos mecanismos garante a
autenticidade dos anuncios e que estes non foran alterados trala súa
publicación. Da mesma forma, o novo BOPPO inclúe un arquivo co
sumario do mesmo tamén asinado de xeito electrónico.
Outro
dos cambios introducidos é a inclusión dun código seguro de
verificación en todos os anuncios publicados que permite aos
cidadáns verificar a autenticidade dun anuncio impreso cotexando
este coa súa versión dixital.
Novos
servizos para os cidadáns
O
novo BOPPO inclúe tamén melloras no seu portal web orientadas a
optimizar os servizos que se prestan aos cidadáns que consultan a
diario esta publicación. Así por exemplo, incorpóranse melloras no
buscador que permitirán localizar anuncios polo organismo que os
publica ou pola tipoloxía do propio anuncio.
Outras
das melloras principais incorporadas no novo sistema permite que os
cidadáns se subscriban ao BOPPO recibindo todos os días unha
notificación no seu correo electrónico informándolles dos novos
anuncios publicados no boletín. Esta subscrición pode realizarse
para calquera anuncio do boletín ou só para determinados tipos de
anuncios como por exemplo “convenios colectivos”, “editos
xudiciais”, etc.
Vindeiras
funcionalidades
Tralo
lanzamento do novo BOPPO a Deputación de Pontevedra continúa a
traballar na posta en marcha de novos servizos que melloren os que xa
se están a prestar. Así por exemplo, logo da posta en marcha da
sede electrónica da Deputación de Pontevedra trabállase na
inclusión na mesma do procedemento de solicitude de inserción de
anuncios no BOPPO. Segundo explican fontes do organismo provincial,
“isto permitirá aos cidadáns realizar esta solicitude de maneira
telemática co emprego do certificado dixital ou o DNI electrónico
evitando a necesidade de realizar desprazamentos para remitir as
solicitudes a algún dos rexistros da Deputación de Pontevedra”.
- Ferramenta de maquetación Adobe InDesign
Outras
das funcionalidades que se porán en marcha de forma inminente
permitirá verificar a autenticidade dos anuncios a través da
incorporación nos mesmos dun código QR que permitirá descargar de
forma automática o arquivo electrónico dende calquera dispositivo
móbil que conte con conexión a Internet e con algunha aplicación
instalada para ler este tipos de códigos.
Outra
das funcionalidades permitirá realizar a tradución automática ao
castelán ou o galego dos anuncios publicados en función do idioma
no que estes foron publicados inicialmente. O BOPPO publícase a día
de hoxe no idioma no que o anunciante envía o anuncio polo que esta
funcionalidade permitirá consultalo no idioma que se desexe tendo en
conta sempre as limitacións das ferramentas de tradución
automática.
Plataforma
tecnolóxica
O
novo BOPPO susténtase nun conxunto de compoñentes software e
hardware que garanten unha tramitación integramente electrónica da
publicación do boletín. Toda esta infraestrutura acubíllase no CPD
da Deputación de Pontevedra o que garante una prestación do servizo
en alta dispoñibilidade.
O
portal do BOPPO está implantado sobre a plataforma de xestión de
portais da Deputación de Pontevedra baseada na solución Liferay na
versión 6.1.
Todos
os boletíns publicados, tanto na versión PDF como na HTML, están
almacenados no sistema de xestión documental da institución baseado
no produto IBM Filenet. Segundo a Deputación, “o uso deste xestor
documental garante un rendemento óptimo na velocidade de
transferencia de arquivos e aporta funcionalidades avanzadas na
indexación do contido dos mesmos o que se traduce en melloras
importantes na localización dos anuncios a través da busca por
texto dende o portal”.
Todo
o proceso de tramitación do boletín apoiase no xestor de
expedientes eDepo implantado sobre o produto Cividas. Esta ferramenta
permite realizar unha xestión integral e completamente telemática
dende a recepción do anuncio nalgún dos rexistros da institución
ata a súa publicación no portal do boletín.
Para
as tarefas de maquetado dos anuncios contase coa ferramenta InDesign
de Adobe e mais concretamente conta con dous compoñentes
fundamentais. Por unha bada, a arquitectura da solución fai uso da
plataforma InDesign server que se encarga de realizar unha
pre-maquetación dos anuncios recibidos aplicando sobre estes un
modelo e conxunto de estilos predeterminados. A maiores, estes
anuncios serán maquetados de forma definitiva utilizando para elo o
aplicativo InDesign.
O
xefe de servizo de Novas Tecnoloxías destaca que “coa posta en
marcha deste sistema a Deputación de Pontevedra reafirma o seu
compromiso coa simplificación dos seus procedementos administrativos
e coa eliminación do uso do papel na administración utilizando para
isto as novas tecnoloxías”.