A Deputación de Pontevedra impulsará o emprendemento colaborativo e innovador en Barro, Meis e Lalín
martes, 1 de decembro do 2015
A Deputación de Pontevedra está a apostar polas
novas formas de traballo colaborativo e innovador. Así
se reflicte no acordo asinado estes días coa Escola de Organización
Industrial encamiñado a impulsar o emprendemento na provincia.
Segundo fai saber a entidade provincial, a través deste convenio
destinaranse 320.000 euros para a creación de espazos conxuntos de
co-working (traducíbel por co-traballo:
unha nova fórmula laboral que xunta diversos profesionais e sectores
compartindo un mesmo espazo físico e virtual e desenvolver proxectos
independentes ou conxuntos) no Polígono Industrial de
Barro-Meis e en Lalín. Neles levaranse a cabo actuacións de
formación, seguimento e adestramento para os novos proxectos
empresariais acubillados.
O convenio, que terá unha vixencia de dous anos
prorrogábeis, abrangue o equipamento destes espazos de Lalín, Barro
e Meis con conexión Wi-Fi e eléctrica. Nestes acubillos de
co-working farase especial fincapé en fomentar novas
metodoloxías de traballo, comezándose pola fórmula do Lean
Startup, destinada a acelerar o proceso de identificación da
visibilidade dos proxectos emprendedores. Segundo avanza a
Deputación, os espazos contarán tamén cun servizo de coordinación
para o apoio de emprendementos, centro de formación e salas de
reunión para o proceso de seguimento e tutela.
Con esta iniciativa a Deputación de Pontevedra
busca fomentar o emprendemento na provincia e aumentar a
probabilidade de éxito dos proxectos dos emprendedores nun período
limitado de tempo, “identificando aqueles con maior potencial de
desenvolvemento”. Para isto, realizaranse catro convocatorias
públicas de co-working cunha duración, cada unha delas, de 5
meses, dando cabida cada unha a un mínimo de 16 e máximo de 22
proxectos emprendedores nos que participarán entre unha e tres
persoas. Cada convocatoria desenvolverá 12 obradoiros obrigados de
formación de 5 horas cada un sobre o desenvolvemento de competencias
de emprendemento e xestión de proxectos. Por certo que cada edición
de co-working incluirá eventos co obxectivo de impulsar o
networking entre emprendedores así como, nas semanas finais
do proxecto, unha xornada demostrativa de presentación das
actuacións.