A Fundación Vodafone dá a coñecer as súas aulas dixitais portátiles para campos de refuxiados
mércores, 4 de marzo do 2015
As empresas TIC están
que non paran no Mobile World Congress, amosando novos servizos e,
tamén, achegas de carácter marcadamente social, solidario e
humanitario. Sen ir máis lonxe, a
Fundación Vodafone deu a coñecer na feira de Barcelona a súa
iniciativa Instant Classroom, unha proposta para dar forma a
escolas dixitais e que, segunda apunta a compañía de
telecomunicacións, poden instalarse moi axiña e fornecer aos nenos
e adolescentes do mundo “unha oportunidade para prolongar os seus
estudos nos campos de refuxiados”.
Instant Classroom, engade
a empresa, foi deseñada para operar en zonas onde a electricidade e
a conexión a Internet son escasas ou inexistentes e será despregada
en colaboración coas Unidades de Innovación e Educación de ACNUR
(Alto Comisionado das Nacións Unidas para os refuxiados).
A aula dixital, para
facernos unha idea da súa flexibilidade e lixeireza, pode carretarse
nunha caixa de algo máis de cincuenta quilos e vén equipada cun
portátil, 25 tabletas con software formativo xa instalado, un
proxector, un altofalante e un módem que proporciona conexión 3G.
“As tabletas”, explica Vodafone, “conéctanse de maneira local
ao portátil, permitindo aos profesores distribuír contidos e
aplicacións aos alumnos sen necesidade de acceder a Internet”.
Asemade, a empresa sinala
que todos os compoñentes de Instant Classroom poden cargarse de
forma simultánea desde unha única fonte de electricidade mentres a
caixa está pechada. “Tras 6 ou 8 horas de carga, Instant Classroom
emprégase durante un día enteiro nunha aula sen acceso a
electricidade”, explica.
Sobre a súa aplicación
práctica, Instant Classroom chegará en breve a unha ducia de
complexos de persoas desprazadas de Kakuma (Kenia), en Nyarungusu
(Tanzania) e na República Democrática do Congo. “Até 15.000
nenos e mozos de entre 7 e 20 anos poderán acceder a métodos de
ensino só dispoñíbeis arestora nalgunhas escolas dos países máis
desenvolvidos”, explica a fundación.