A Galipedia chega aos 125.000 artigos
martes, 15 de setembro do 2015
A Galipedia,
a enciclopedia libre en galego, superou este 14 de setembro os
125.000 artigos. Así nolo lembra Elisardo Juncal,
co-administrador da versión na nosa lingua da Wikipedia, quen tamén
recorda que ter acadado a devandita cifra sitúa ao proxecto na
posición 45 por número de artigos entre todas as wikipedias
da Fundación Wikimedia, “todo isto grazas á colaboración de
todos os usuarios”. Cómpre sinalar que a Galipedia foi posta en
marcha en 2003 e que, dende aquela, foi obxecto dun imparábel
proceso de crecemento en número de artigos, pero tamén en materia
de comunidade e calidade (isto último grazas á adopción dun réxime
de revisión constante de contidos).
Proba do devandito, sinala Juncal, é a consecución
de 43 artigos de calidade, que son algúns dos mellores artigos que
hai no proxecto, e que nalgúns casos son superiores aos das
wikipedias noutras linguas. “A Galipedia”, explican os
seus impulsores, é unha iniciativa aberta e sen límites e “todo o
mundo pode colaborar sen importar o seu nivel académico”. De
feito, hai tarefas axeitadas para cada persoa que queira cooperar e
formas de botar unha man que non implican a edición de artigo. Por
exemplo, unha maneira moi importante de axudar no proxecto é subir
fotografías con licenza libre dos lugares da nosa terra, as aldeas,
os ríos, os castros, os petróglifos, as praias, etc. “Dende o
proxecto”, explica Juncal, “sempre animamos á xente a que
participe na creación da enciclopedia de todas e todos, e se non
saben por onde comezar poden pedir axuda na Taberna que sempre hai
alguén para botar unha man aos que empezan”.