A Mesa lanza campaña na Rede para denunciar a discriminación ao galego do IDAE
venres, 22 de xullo do 2016
A Mesa pola Normalización Lingüística vén de pór
en marcha nas redes sociais unha campaña para impulsar a dimisión
ou cesamento dos responsábeis do Instituto para a Diversificación e
o Aforro Enerxético (IDAE), dependente do Ministerio de Industria,
que negaron axudas aos Concellos de Teo, Santa Comba e Santiago por
ter presentado en galego os informes para a solicitude.
A
campaña en cuestión estase a artellar a través da propia web da
Mesa (cunha petición colectiva na que poden asinar os internautas)
e tamén nos sitios que a plataforma mantén no Facebook
e máis no Twitter, onde se
está a xerar unha intensa actividade contestataria e de repulsa
contra este proceder do IDAE que A Mesa cualifica de “chantaxe
lingüística” e “claramente discriminatorio”.
Segundo recorda a plataforma galega a prol da
lingua, o rexeitamento das ditas solicitudes por estaren redactadas
en galego vulnera entre outros regulamentos (alén do feito de que o
galego é idioma co-oficial do Estado) o contemplado na Carta Europea
das Linguas Rexionais ou Minorizadas, tratado internacional
ratificado polo Estado español en 2001, que no seu artigo 10 sinala
que as autoridades públicas deben de “garantir que as autoridades
administrativas empreguen as linguas minorizadas” e “permitir ás
autoridades administrativas redactar documentos nunha lingua
minorizada”.