A Praza e o Mercado de Lugo locen proxecto multimedia de promoción
venres, 29 de xullo do 2016
Esta
semana presentouse en Lugo un innovador proxecto multimedia de
promoción do Mercado de Quiroga Ballesteros e máis da Praza de
Abastos. A iniciativa vén da man do Concello, o grupo El Progreso e
a Fundación TIC (Deputación). Trátase, en detalle, dun “paper
monográfico” adicado aos devanditos emprazamentos comerciais con
páxinas dixitais que dan acceso táctil a vídeos realizados por un
equipo de estudantes da Fundación, e tamén a textos e fotos de
xornalistas e reporteiros do dito medio local.
O
presidente da Fundación TIC e da Deputación, Darío Campos; a
alcaldesa de Lugo, Lara Méndez; e a presidenta de
El Progreso,
Blanca García Montenegro, presentaron este martes o documento
audiovisual, nun acto que se celebrou na propia praza ao que tamén
asistiu o patrón da TIC, Álvaro Santos, e outras autoridades.
A
publicación pódese consultar a través da web da TIC,
fundaciontic.org,
que tamén lle dará difusión nas redes sociais, e na web do xornal,
a canle dixital galiciae.com.
“A peculiaridade do traballo”, explicaron, “é que dá a opción
de acceder aos contidos pasando as follas, nas pantallas táctiles de
ordenador, tableta, ou de calquera dispositivo móbil”. Segundo
engadiron, un equipo de profesionais, bolseiros e alumnos da TIC
encargouse de todas as xestións e do traballo de produción preciso
para levar adiante o proxecto, inserido na promoción destes espazos
sociais e comerciais recentemente remodelados.
A
Fundación tamén se ocupou da filmación e da realización de
fotografías de cada un dos postos da praza e o mercado municipais
(55 vídeos que serven de presentación dos distintos postos e nos
que se inclúen explicacións, receitas e curiosidades narradas polos
empresarios que rexentan os establecementos comerciais e de
hostalería).