A UVigo achega contedores avanzados para desbotar aparellos e colaborar na reciclaxe
venres, 17 de outubro do 2014
A comunidade dos
campus da Universidade de Vigo vaino ter máis doado á hora de
desfacerse de refugallos electrónicos e eléctricos. Refugallos que,
cómpre salientalo, logo serán empregados para segundas e terceiras
vidas (no caso de que sexa viábel e posíbel e todo dependerá do
estado de cousas de cada trebello). Segundo fan saber fontes da
Uvigo, aparellos
de pequeno e mediano tamaño poderán ser depositados en dous novos
contedores intelixentes que se atopan instalados xa na praza Miralles
e máis na Escola Técnica Superior de Enxeñaría de Minas, onde
fincarán as vindeiras semanas ata seren trasladados ao campus de
Pontevedra. A iniciativa foi posíbel grazas á colaboración entre
os proxectos EcoRaee, da
Universidade de Vigo e Identis
Weee, a través da Fundación
Ecolum. Desenvólvese ao abeiro do programa europeo Life+.
En base ao acordo, a
Universidade de Vigo poderá beneficiarse dunha parte dos refugallos
que se depositen nos contedores, concretamente os residuos dos
aparellos informáticos, que EcoRaee utiliza nos seus demostrativos
nos que se valoran posíbeis usos para estes equipos, nalgúns casos
para propósitos diferentes para os que foron creados en orixe. O
contedor localizado agora na praza Miralles, informa a Universidade,
é un depósito de gran tamaño e autónomo, que funciona con placas
solares e que acubilla no seu interior varios receptores con
distintas capacidades nas que se aloxan os residuos, segundo a súa
tipoloxía. No caso dos contedores situados tanto na Escola Técnica
Superior de Enxeñaría de Minas como no polideportivo de O Porriño
son recipientes dun tamaño inferior que precisan dunha toma de
corrente eléctrica para a alimentación do computador que leva
incorporado.
Os responsábeis de
EcoRaee, así como os seus colaboradores Revertia e EnergyLab;
Identis Weee e a Fundación Ecolum, están a facer xa un chamamento á
comunidade universitaria para que participe desta iniciativa, “que
só no caso dos aparellos informáticos permitirá frear o incremento
exponencial no volume de residuos que se dispara de xeito exponencial
por causa da limitada vida útil destes equipos”, explican.