A Universidade de Cádiz achega libros electrónicos a través da plataforma galega XeBook

venres, 23 de xaneiro do 2015 Redacción

A plataforma galega XeBook, desenvolvida por Xercode, xa está na Universidade de Cádiz. Segundo informa a dita empresa, a biblioteca da institución académica puxo a disposición dos seus usuarios un servizo de préstamo de libros electrónicos baseado directamente en XeBook que servirá, entre outras cousas, para que a comunidade universitaria poida acceder aos contidos das editoriais privadas, da editorial da propia Universidade e doutras editoriais universitarias a través da iniciativa de intercambio científico dixital REBIUN-UNE. Segundo engade Xercode, a de Cádiz é a primeira institución académica superior da súa Comunidade que oferta o sistema de préstamo de libros electrónicos mediante XeBook.
A iniciativa foi presentada os días pasados polo vicerreitor de Responsabilidade Social e Servizos Universitarios da UCA, David Almorza, acompañado pola directora do servizo de Publicacións, Ana Bocanegra, e a director da área de Biblioteca e Arquivo da UCA, Ricardo Chamorro. Segundo salientaron e reflicte Xercode, o novo servizo de préstamo de ebooks científicos iníciase con 770 títulos, os cales serán incrementados durante os vindeiros meses, procedentes das editoriais universitarias españolas e dunha colección multidisciplinar cos exemplares máis demandados, e inclúese tamén a posibilidade de compra online.
Lembrar que XeBook é unha plataforma tecnolóxica desenvolvida pola empresa Xercode que permite ás bibliotecas e editoriais abordar o préstamo de libros electrónicos. A través da tecnoloxía da empresa galega, as bibliotecas poden incorporar “de maneira simple e centralizada” o novo fluxo dixital, desde a adquisición e xestión das coleccións dixitais até a incorporación ao catálogo e o acceso aos contidos a través do servizo de préstamo.

PUBLICIDADE