A XIX Noite Galega das Telecomunicacións acolleu un chamamento colectivo a prol dunha sanidade sustentábel e innovadora
venres, 24 de outubro do 2014
Finalmente
celebrouse na Toxa, O Grove, a
dezanove edición da Noite Galega das Telecomunicacións e da
Sociedade da Información, unha cita clave no noso calendario de
celebracións TIC e que este ano tivo como eixe temático as
cuestións (cada vez máis relevantes e con meirandes implicacións e
ramificacións) da eSaúde e as tecnoloxías sociais. A Noite, que
contou coa participación de 300 profesionais dos nosos ámbitos
privado e público das tecnoloxías e a saúde, foi inaugurada polo
decano e presidente do COETG e AETG (Colexio Oficial e a Asociación
de Enxeñeiros de Telecomunicación de Galicia). Falamos de Ramón
Bermúdez de Castro, que aproveitou a cita para facer un chamamento
ben claro: “Precisamos unha sanidade sostible e conectada co
futuro”.
Na
súa opinión, as TIC e a innovación en tratamentos son a pauta a
seguir: “Temos unha excelente sanidade, unha das mellores do mundo,
pero podemos perder esa posición de vangarda se non a facemos
sostible e conectada co futuro, coas novas tecnoloxías e cos novos
tratamentos”, asegurou o decano do Colexio Oficial e presidente da
Asociación de Enxeñeiros de Telecomunicación de Galicia, Ramón
Bermúdez de Castro, durante a súa intervención na XIX Noite
Galega das Telecomunicacións e a Sociedade da Información,
que se celebrou este venres no Gran Hotel da Toxa.
Como
dixemos, este ano a gala organizada polo Colexio Oficial e a
Asociación de Enxeñeiros de Telecomunicación de Galicia estivo
dedicada á sociedade dixital e a
saúde. Segundo fixo saber a organización, esta elección temática
débese en parte a que “nos
últimos meses as grandes compañías de telefonía móbil puxeron en
marcha unha grande variedade de aplicacións dedicadas a saúde, que
terán un impacto moi positivo no control dos doentes crónicos”.
Ademais, débese a aposta do SERGAS e a Consellería de Sanidade a
prol da potenciación das empresas tecnolóxicas galegas, cos seus
programas Innova Saúde e Hospital 2050.
Á
cita asistiron preto de 300 persoas, entre elas o conselleiro de
Economía e Industria da Xunta, Francisco Conde; a directora da
Axencia para a Modernización Tecnolóxica de Galicia (AMTEGA), Mar
Pereira; a secretaria xeral da Consellería de Sanidade, Josefina
Monteagudo; e o xerente do SERGAS, Antonio Fernández-Campa, e unha
nutrida representación dos centros sanitarios públicos e privados
da nosa comunidade.
A
XIX Noite Galega das Telecomunicacións e da
Sociedade da Información contou co patrocinio de Abertis Telecom,
Acuntia, BBVA, Cisco, EGATEL, Ericsson, a Escola de Enxeñería de
Telecomunicación da Universidade de Vigo, Everis, Gradiant, Idom,
Indra, Ineo, a Fundación Enxeñeiro Gerardo García Campos, Oracle,
R, Retegal, Satec, Telecon, Telefónica, Televes, Tesec, Ufinet e
Vodafone.
A
gala, que foi presentada polo actor galego Javier Veiga, deu comezo
ás nove e media da noite coa proxección dun vídeo no que se puxo
de manifesto a importancia da sanidade galega, que xera 36.000 postos
de traballo na empresa pública e 10.000 na privada. Neste vídeo, a
conselleira de Sanidade, Rocío Mosquera, advirte da necesidade de
evolucionar dende un sistema pensado para os pacientes agudos a outro
que se centre nos crónicos, e nese camiño “as Tecnoloxías da
Información e a Comunicación serán fundamentais”, sinala.
Trala
proxección, Ramón Bermúdez de Castro, decano e presidente do
Colexio Oficial e a Asociación de Enxeñeiros de Telecomunicación
de Galicia, dirixiu unhas palabras de benvida a todos os asistentes e
lembrou que “aquí mesmo, nesta terra, temos creado solucións
estupendas, que se están a exportar a outros países, pero que non
se aplican en todas as comunidades autónomas”. E engadiu: “Aquí
hai intelixencia, ciencia, saber, capacidade, innovación e
dinamismo... Utilicémolos... Non nos podemos permitir formar a
excelentes técnicos e enxeñeiros para que marchen”. Segundo fixo
saber, “é hora de apostar pola investigación e o desenvolvemento,
pola vangarda tecnolóxica e dixital, sen dúbida unha das mellores
maneiras de facer país”.
Acto
seguido entregáronse os Premios
Galicia das Telecomunicacións e a Sociedade da Información 2014,
que recoñecen o compromiso das persoas e empresas co desenvolvemento
das TIC. Os sete gañadores desta edición son os seguintes:
·
Premio Ingeniero Gerardo García Campos á mellor iniciativa
empresarial no sector TIC, outorgado polo Colexio Oficial e a
Asociación de Enxeñeiros de Telecomunicación de Galicia, para
Torus
Software Solutions SL. Entregou o premio o director
xeral de Intelsis, Gerardo García Alvela, e recolleuno Guillermo
López Taboada, de Torus Software Solutions.
·
Premio GRADIANT á mellor tese doutoral aplicada ao sector TIC
2014 outorgado polo Colexio Oficial e a Asociación de Enxeñeiros de
Telecomunicación de Galicia, para Francisco
Alberto Varela García, por Análise
xeoespacial para a caracterización funcional das infraestruturas
viarias en modelos de accesibilidade territorial utilizando sistemas
de información xeográfica.
O propio Francisco Varela recolleu o galardón de mans do director
xerente de Gradiant, Fernando Jiménez Vigo.
·
Premio INEO ao produto ou servizo TIC máis innovador de 2014,
outorgado polo Colexio Oficial e a Asociación de Enxeñeiros de
Telecomunicación de Galicia, para a UTE
Everis-Coremain polo seu proxecto InnovaSIS,
Sistema integral de xestión de pacientes.
O encargado de entregar o recoñecemento foi o
presidente de INEO, Jorge Cebreiros. Recibiuno Alberto Borrego Díez,
health-director de Everis.
·
Premio ao Mellor Proxecto TIC con Beneficios Sociais outorgado
polo Colexio Oficial e a Asociación de Enxeñeiros de
Telecomunicación de Galicia, en colaboración con Amtega, paran
InfoJC S.L.,
polo proxecto, Dixesta:
Tecnoloxías innovadoras para a vida saudable. Entregouno
a directora da Axencia para a Modernización
Tecnolóxica de Galicia, Mar Pereira, a Javier Cebreiros, de Info JC.
·
Premio Acuntia á empresa galega que aposta polo
desenvolvemento de infraestruturas intelixentes de telecomunicacións,
outorgado polo Colexio Oficial e a Asociación de Enxeñeiros de
Telecomunicación de Galicia, para a compañía R. O encargado de
recollelo foi Julio Sánchez Agrelo, director da División de Rede da
compañía, a quen lle foi outorgado polo conselleiro delegado de
Acuntia, D. José Manuel Sánchez Mirón.
·
Socio de Honra 2014, da Asociación de Enxeñeiros de
Telecomunicación de Galicia para a Cruz
Vermella de Galicia. Fixo entrega do galardón Ramón Bermúdez de
Castro, decano e presidente do Colexio Oficial e a Asociación de
Enxeñeiros de Telecomunicación de Galicia. Recibiuno a presidenta
da ONG na nosa comunidade, Carmen Colmeiro.
·
Enxeñeiro do Ano 2014 do Colexio Oficial e
da Asociación de Enxeñeiros de Telecomunicación de Galicia para
Gil Carlos
Bernárdez Matovelle, expresidente e socio fundador da
AETG, quen recolleu o premio de mans do conselleiro de Economía e
Industria, Francisco Conde.
Trala
entrega dos galardóns, o enxeñeiro do ano, Gil Bernárdez,
pronunciou unhas palabras en nome de todos os premiados, nas que
asegurou que é “un teleco de vocación” e nas que salientou que
os enxeñeiros de Telecomunicación “fomos un piar fundamental para
o desenvolvemento da Sociedade da Información, pero sempre estivemos
na trastenda”. Ademais, recomendou aos seus compañeiros máis
novos que opten por dúas vías: “O emprendemento, que require
esforzo e non é doado, ou a reconversión, para deixar de ser
técnicos e virar en ‘telecnólogos’, un palabro que designa a un
especialista en aplicar as TIC á mellora dos modelos de negocio dos
diferentes sectores produtivos e socioeconómicos”.
O
encargado de despedir a XIX Noite Galega das Telecomunicacións e a
Sociedade da Información foi o conselleiro de Economía e Industria,
que pronunciou o discurso de clausura.
- Fotografía de grupo dos participantes na gala