A Xunta colaborará co CPETIG en materia formativa
luns, 28 de marzo do 2011
A Xunta e os
enxeñeiros técnicos en Informática unirán forzas no camiño de
mellorar a oferta formativa actual ligada á seguridade dixital no
noso país. Así
nolo conta a Secretaría Xeral de Modernización, que asinou un
acordo co Colexio Profesional de Enxeñaría Técnica en Informática
de Galicia (CPETIG) para encher
determinados ocos de información e formación no eido das peritaxes
xudiciais e técnicas probatorias. Esta arela materializarase na
organización conxunta de accións formativas de diversa índole,
entre as que se contan achegas para a divulgación das vantaxes da
Sociedade da Información entre a cidadanía galega.
Segundo se establece no
acordo asinado por Mar Pereira e Marcos Mata, a Secretaría Xeral
achegará un total de 70.000 euros para a celebración de tres
seminarios e as II Xornadas sobre informática xudicial e delitos
informáticos, actividades que
teñen como obxecto principal informar aos xuristas acerca dos
últimos avances no eido da peritaxe e a probatoria. “A
finalidade última”, informan a Xunta e o CPETIG, “é
dotar de maior seguridade xurídica á nova realidade tecnolóxica ao
tempo que incrementar a eficacia da administración xudicial co uso
das novas ferramentas electrónicas e forenses avanzadas”.
O
acordo tamén inclúe un curso de peritaxe para achegarlles
coñecemento específico aos estudantes e aos profesionais da
Enxeñaría Técnica en Informática sobre as técnicas recentes en
análise forense e práctica pericial, amais de formalos na normativa
lega ligada ao eido da informática.
Asemade,
o convenio prevé a realización dun seminario sobre aplicacións
móbiles aplicadas ao negocio e, como dixemos, a segunda edición das
Xornadas de Informática Xudicial e Delitos Informáticos. Este
evento do CPEITG porá en xogo un punto de encontro entre
profesionais do eido tecnolóxico-dixital galego e os integrantes dos
ámbitos xudicial e xurídico de Galicia, incluídos maxistrados,
xuíces, avogados, fiscais e peritos. Amais disto, as xornadas teñen
o obxectivo de “transmitirlle á sociedade a relación
existente entre a informática e o ámbito xudicial, tanto pola
natureza dos delitos como polas ferramentas para a súa
investigación, persecución e condena; así como por de manifesto os
últimos avances nesta materia”.
O acordo abrangue a
celebración dun seminario sobre a Lei Orgánica de Protección de
Datos (LOPD) e as redes sociais, “no que se darán a
coñecer as ameazas á intimidade que poden xurdir coas redes sociais
mal empregadas, como facer un uso responsable delas e que se pode
facer ante os abusos e como evitalos”.