A Xunta recibe o premio ás mellores iniciativas TIC 2011 da man da Fundación Dintel
xoves, 27 de xaneiro do 2011
- A secretaria xeral de Modernización recollendo o premio
A Fundación
Dintel, dedicada á difusión da Tecnoloxías da Información e a Comunicación a
nivel estatal, vén de convocar unha nova edición dos seus Premios Dintel Alta
Dirección, no marco dos cales acordou concederlle á Xunta o galardón ás Mellores Iniciativas TIC nas Administracións
Públicas.
Estes premios,
convocados anualmente para recoñecer iniciativas e actuacións levadas a cabo no
ámbito tecnolóxico, establece 10 categorías, e a Xunta foi galardoada na de
Administracións Públicas pola súa dedicación e especial esforzo na aplicación
das TIC en eidos tan diversos e de tanta repercusión social como a sanidade, a
xustiza ou a educación.
Cabe lembrar, por
outra banda, que a nosa Administración autonómica estableceu as liñas de
actuación en materia tecnolóxica na Axenda Dixital de Galicia 2014.gal como folla de ruta para o impulso definitivo das
novas tecnoloxías en Galicia. Unha axenda dixital, segundo aseguran, “plenamente
aliñada coa Axenda Dixital Europea”, e que actúa nos diferentes
ámbitos: na mellora das infraestruturas tecnolóxicas, na modernización da
administración pública, na posta en
marcha de servizos públicos innovadores e na mellora da competitividade dos
sectores tradicionais a través dun uso intensivo das novas tecnoloxías.
Asemade, unha
das primeiras decisións do actual Goberno galego en materia tecnolóxica foi a
posta en marcha do Plan de Banda Larga de Galicia co obxectivo de garantir o acceso a Internet a todos os
galegos e galegas. Unha aposta por conectar ao rural de Galicia co resto
do mundo e unha aposta por despregar en Galicia as redes máis potentes e máis
veloces do mundo. En menos dun ano da súa posta en marcha, os seus precursores
aseguran que “reduciuse en 250.000 o
número de persoas que carecían de acceso á Rede na Comunidade”, algo que,
sen dúbida, influíu de maneira importante na decisión do xurado de concederlle
este premio á Xunta.
Pero non é
todo, no marco do Plan de Modernización
da Administración Pública, acábase de aprobar o decreto que regula o
desenvolvemento da Administración electrónica e que dará soporte ás
accións para acadar unha Administración
sen papeis, máis transparente e aberta 24 horas ao día e 365 días ao ano a
todos os cidadáns.
A secretaria Xeral de Modernización e
Innovación Tecnolóxica, Mar Pereira, será a encargada de asistir, esta tarde en
Madrid, ao acto de entrega destes premios no que agradecerá, en nome da Xunta,
o recoñecemento ao traballo realizado ata o de agora.