A arte e a innovación, a debate na xornada AvantCraft en Lugo

Innovación, arte, vangarda e tecnoloxía son conceptos que adoitan a aparecer xuntos en innumerables ocasións. E probablemente non sexa casualidade, xa que a vontade da persoa creativa (sexa do eido profesional que sexa ou se dedique ó que se dedique) é as máis das veces acadar algo que nunca antes se vira ou se experimentara, pero tirando partido (para continualo ou para rompelo) do que xa se fixo, da tradición. Estas e outras cuestións van ser tratadas este mércores 31 nos relatorios do proxecto europeo Avantcraft, no salón de actos da Deputación de Lugo, a partir das 18.30 horas.
A xornada, que é de balde, inclúe conferencias e mesas redondas, que contarán coa presenza de Juan Carlos Santos Capa (analista de mercado), Joao María André (filósofo) ou Xoan Piñón (fotógrafo). Os temas a tratar serán ben variados, pero xirarán case todos eles arredor da idea de innovación nas artes, na vangarda pura: cultura e mercado, creatividade, tendencias da artesanía contemporánea, o valor das ideas (comunicación de principio a fin), etc. A xornada está organizada polo Centro de Artesanía e Deseño da Deputación Provincial de Lugo e forma parte dun proxecto máis amplo, o devandito Avantcraft, no que participa a Comisión Europea.