A banda de metal Vortex enfía con actividades de geocaching e realidade virtual a promoción do seu novo disco
martes, 30 de agosto do 2016
A música abre camiños alén do estritamente
musical, mesmo no tecnolóxico. Así o entenden os integrantes da
banda de metal Vortex, nada en Pontevedra no ano 2011 (ao abeiro do
Local de Música) e arestora rematando a gravación do seu segundo
traballo discográfico, un CD que é un traballo artístico en si
mesmo pero que tamén constitúe un convite a coñecer o espazo
urbano que os viu medrar como artistas. Para
este convite, lanzado coa colaboración das Concellerías de
Promoción da Cidade e Xuventude, Vortex está a desenvolver unha
semana de geocaching, que
é como se coñece ás quedadas de procura colectiva de
tesouros botando man das novas ferramentas tecnolóxicas. A banda,
por certo, está formada por Jacobo Sainz (guitarra e voz), Marcos
Rodríguez (guitarra), Víctor García (baixo e coros) e Jonathan
Portela (batería).
Segundo informan, a actividade de
geocaching esténdese
até o venres 2 de setembro. A partir de aí, ábrese o prazo de
inscrición para participarmos nun concurso de fotografía (e ao
remate de 2017 levarase a cabo a presentación oficial do novo
disco).
Respecto da semana adicada ao
geocaching,
vén acompañada dunha intensa actividade nas redes sociais e dun
proxecto innovador que engloba a cidade de Pontevedra: o concepto de
MetroMinuto.
Consiste en agochar 25 discos do primeiro álbum de Vortex,
Confessions,
en lugares estratéxicos do MetroMinuto.
O reto é írmolos atopando. De facelo, temos que facernos unha
foto no emprazamento urbano do achado e subila logo a calquera rede
social atinxindo a banda coa etiqueta #GeoVortex. De facelo así,
gañaremos unha camiseta exclusiva de
Confessions e entraremos no sorteo de
10 copias físicas da súa nova achega discográfica. As pescudas
vanse dando nas redes sociais, tanto as da banda como as do Concello.
Isto obriga a facer seguimento e a irmos incrementando as
comunidades.
Respecto do concurso de
fotografía, trátase de fotografar a banda en lugares
representativos de Pontevedra, seguindo un roteiro e con diferentes
posicións. Os concursantes teremos liberdade artística para
obtermos a nosa imaxe, cumprindo só dous requisitos: que saian os
catro integrantes da banda e que se vexa a paisaxe da cidade. Logo,
escolleremos dúas fotos finais que se subirán ao sitio de Vortex no
Facebook. As cinco máis votadas de todas as fornecidas serán as
finalistas. Delas sairá a gañadora que será escollida por un
xurado formado por representantes das partes implicadas e
fotógrafos/as profesionais que non participaran no concurso. A
persoa gañadora obterá un paquete de produtos da banda, unha
exposición durante a presentación do disco na Casa da Luz e o uso
da fotografía para toda a promoción do disco. A inscrición, e o
envío de imaxe realizarase a través do correo da banda
(vortexpontevedra@gmail.com).
A
maiores, farase un
videoclip da canción extraída do disco en formato 360 graos,
publicitándose de maneira complementaria nos medios e nas webs e
acompañando a campaña con promoción de Pontevedra.
O disco presentarase de maneira
oficial na Casa da Luz como empresa participante da iniciativa
Pontevedra ten un Puntazo. A
novidade será que os asistentes poderán visualizar e escoitar o
videoclip do single
do novo disco acompañados dunha experiencia VR a través dunhas
gafas de realidade virtual.