A biblioteca de Brión pon a disposición da comunidade escolar un servizo de contidos dixitais de acceso libre
xoves, 23 de outubro do 2014
A
biblioteca
pública municipal de Brión informou da posta a disposición da
cidadanía dun novo servizo de contidos dixitais en liña de
especial interese para a comunidade escolar, ou sexa para o
profesorado, o alumnado e as familias por enteiro dos nosos pequenos
e adolescentes. O servizo inclúe “múltiples recursos e
ferramentas” de gran potencial de uso para os eidos de segundo
ciclo de Primaria e Educación Secundaria. Estamos a falar de
AulaPlaneta,
en palabras do Concello de Brión “unha solución 100% dixital
dirixida especialmente á comunidade educativa”.
Entre as
súas principais características, engaden os seus responsábeis,
AulaPlaneta salienta por botar man “do maior banco de contidos
dixitais, o do Grupo Planeta”, xuntando as posibilidades desta
inxente base de datos “coas metodoloxías de ensino e aprendizaxe
máis innovadoras”. O resultado, din, é un servizo que facilita
moito o labor do profesor, amais de impulsar a motivación do
estudante e a implicación das familias.
Dende a
biblioteca municipal tamén fan fincapé no proceso de medre no que
está mergullada a plataforma AulaPlaneta, un proceso que atinxe non
só as demandas formativas dos alumnos (abrangue as necesidades
académicas dos plans de estudo de 5º e 6º de Primaria e toda a
etapa de Educación Secundaria Obrigatoria), senón tamén ás
escolas ás que chega (máis de 2.000 centros educativos españois).