A campaña en liña O Mundial fala galego colle novos folgos co inicio do campionato
venres, 13 de xuño do 2014
Co gallo do comezo do
Mundial de Fútbol de Brasil e das vagas de insolidariedade (esas
primas e eses soldos para os xogadores) e de totalitarismos
patrióticos que adoitan acompañar o campionato (esas bandeiras
españolas que dificilmente representan a realidade e o día a día
dos españois e moito menos aínda ás súas diferentes identidades e
sentires), a asociación AGAL quere lembrarnos que hai outros xeitos
de celebrar a competición. Para comezar, podemos celebrala na Rede e
en galego, e que mellor que apoiármonos para isto nos nosos irmáns da
lusofonía?
Para AGAL, cómpre que
lembremos unha vez máis que portugués e galego son a mesma lingua,
polo que esta edición brasileira do Mundial é un privilexio ao noso
dispor, “xa que será desenvolvido na nossa língua própria”.
Para promover e amosar ao máximo esta circunstancia, AGAL desenvolve
dende hai días na Rede a campaña O
Mundial fala galego.
Para metérmonos en
situación, vense de
lanzar tamén un vídeo sobre os motivos para celebrar a competición
ao xeito de AGAL.
A campaña, en palabras
dos integrantes da plataforma, susténtase sobre a necesidade de
promover a nosa lingua e facelo internacionalmente, unha lingua que,
para quen non o saiba, abre importantes portas e oportunidades alén
das nosas fronteiras, “se sabemos e queremos aproveitá-las
coletivamente”, sinalan. O feito de que Brasil fale galego, e máis
polo miúdo de que o Mundial tamén o faga, constitúe claramente
unha destas “oportunidades”.
A campaña en Internet,
sinalan, ten varias fases. Nunha primeira convidouse á comunidade en
liña a que contase as razóns de que o galego sexa unha lingua
mundial. O pasado 17 de maio graváronse dous vídeos específicos
para a campaña, vídeos nos que se amosaba “que a nossa língua
vale para o futebol de pachanga (para o dia-a-dia) assim como para o
maior campeonato deste desporto (para os eventos mais importantes”.
A última fase da iniciativa de promoción e divulgación comeza esta
semana mesma co arranque da competición. Ao longo do
desenvolvemento, AGAL e os membros da campaña colocarán no sitio
web da mesma diversos contidos en portugués relacionados con Brasil
2014, e todo “para poder acompanhar toda a atualidade e informaçom
arredor deste evento, mas sempre na nossa língua”. O obxectivo é
que “durante esta última etapa esta mensagem de
internacionalizaçom do galego chegue à maior percentagem da
cidadania galega possível, é por isso que durante o mundial a AGAL
vai ter umha presença mínima nas principais webs que
tenhem o galego como língua habitual, e também nas especializadas
em futebol”.