A campaña publicitaria da plataforma eMonte.es, distinguida polo Concello de Santiago
mércores, 5 de outubro do 2016
O Concello de Santiago vén de recoñecer unha
iniciativa dirixida a tirar partido das redes para favorecer a
compravenda de madeira na nosa terra, a plataforma dixital eMonte.es.
Máis polo miúdo, o
Concello decidiu premiar a estratexia de promoción da dita
plataforma levada a cabo polos seus responsábeis: a campaña de
mercadotecnia #TeñoMonte. A distinción insírese no
marco da cuarta convocatoria do Concurso de Publicidade Comercial en
Galego lanzado polo Goberno compostelán. O galardón e a campaña
foron dados a coñecer este mércores pola concelleira de Igualdade e
Desenvolvemento Económico, Marta Lois, acompañada do director de
E-Monte, Víctor Rivas, e da directora da compañía de mercadotecnia
Esgalla, Natalia Martínez.
A campaña distinguida levará a cabo até finais de
novembro tres eventos nas rúas de Compostela e dous concursos a
través das redes sociais. A finalidade desta iniciativa de promoción
é, por unha banda, dar a coñecer eMonte.es
(a primeira plataforma de compra/venda de madeira entre propietarios
e propietarias forestais e empresas) e, por outra banda, recuperar os
nomes tradicionais do monte galego coa colaboración das persoas que
teñen monte en propiedade e da propia veciñanza da cidade.
Este
sábado 8 de outubro será a quenda da primeira cita. Así, entre as
10:00 e as 13:00 horas, na Praza de Abastos instalarase un photocall
ao carón da fonte no que as persoas interesadas poderán participar
escribindo nun encerado o nome da súa parcela de monte. As 75
primeiras persoas que se fagan unha foto co nome do seu monte levarán
de agasallo un pequeno carballo procedente de Viveiros Salgado (Beán,
Ordes).
As outras dúas citas de #TeñoMonte coa
veciñanza serán os días 21 de outubro e 4 de novembro en
diferentes emprazamentos.
Segundo se fixo saber na rolda de prensa, todos os
propietarios forestais que enchan un formulario durante algún dos
tres eventos devanditos na rúa entrarán no sorteo dunha noite para
dúas persoas nos aloxamentos de Do Artesanato, nas Cabanas do
Barranco ou nas Cabañitas del Bosque.
No encontro cos medios tamén se fixo saber que a
campaña de premios e incentivos terá unha vertente dixital, co fin
de “achegarse tamén a un público máis novo e urbano que está
máis afeito a utilizar as redes sociais e as ferramentas en liña”.
O primeiro sorteo concibiuse como unha versión dixital do photocall,
na que os participantes terán que responder a través do Facebook
como se chama o seu monte e onde está.
A segunda actividade
online consistirá nun concurso de textos breves, tamén vía
Facebook. Para participar haberá que contar unha anécdota sobre o
monte (algo que nos aconteceu nunha paraxe concreta, unha historia
escoitada sobre un monte, un achegamento a como era antes). O público
decidirá cos seus votos cales son as mellores historias.
Cada
unha das persoas gañadoras destes concursos dixitais recibirá como
premio unha noite para dúas persoas nas Cabanas do Barranco ou nas
Cabañitas del Bosque.