A coruñesa CIE Tecnoloxías amosa en Santiago as súas alternativas tecnolóxicas de aforro enerxético
venres, 7 de xuño do 2013
Finalmente, tal
e como viñamos anunciando nos días previos, a firma coruñesa
CIE Tecnoloxías celebrou
este xoves en Santiago un seminario sobre eficiencia enerxética e
metodoloxías para abaratar custes na factura eléctrica. A cita, á
que acudiron representantes de máis de vinte compañías,
desenvolveuse no Centro Demostrador TIC (CNTG) da man do director
comercial de CIE, Ángel Santín, que abriu a xornada poñendo de
relevo unha importante carencia de información no noso tecido
empresarial: “O novo modelo de xestión enerxética no
que as empresas poden acudir a unha poxa optando por
diferentes firmas subministradoras segundo os seus
intereses segue a ser un gran descoñecido para a
maioría das compañías”. Para Santín, esta é a situación
actual no sector empresarial e público da nosa terra, onde a factura
enerxética é, cada vez máis, un lastre para a súa viabilidade. A
sesión celebrada no Centro Demostrador TIC dirixiuse, precisamente,
a botar luz sobre todo isto.
Máis polo miúdo, no
seminario explicáronse as claves do novo sistema de tarifas e as
oportunidades dunha xestión dirixida por unha consultora e baseada
no control telemático do consumo. Á sesión de CIE acudiron, entre
outros, representantes de Televés, a Universidade de Santiago (USC),
o Servizo Galego de Saúde (SERGAS), a Axencia para a Modernización
Tecnolóxica de Galicia (AMTEGA), Vodafone, Gadisa e Emalcsa.
Segundo explicou Santín,
para moitos empresarios a factura do luz segue a ser “unha única
cifra a finais de mes”, xa que non poden coñecer
os detalles do gasto e polo tanto, atopar onde se pode aforrar. “Os
sistemas de xestión telemática que nós implantamos”,
explicou, “fan sinxelo o achado dos
consumos residuais, por exemplo en horas que non son laborais, e
optimizar o consumo”. Outra posibilidade que se ofrece é a de
negociar coas subministradoras enerxéticas e seguir as poxas de
enerxía que permiten en ocasións mercar electricidade a custe cero
(excluíndo os impostos). Para CIE, estes sistemas de eficacia
estanse a converter en ferramentas indispensábeis para as empresas,
sobre todo cando xa se albisca unha nova quebra do sistema eléctrico
español, que amorea un déficit de 28.000 millóns de euros. Dende a
empresa galega, apuntan a que ese burato “débese sobre todo ás
primas que reciben certas enerxías como por exemplo as eólicas, e
que implican uns custes e uns intereses que o Estado paga aumentando
os impostos”. Deste xeito,
engádese, a cidadanía estaría a pagar uns 800 millóns de euros de
intereses polo devandito déficit, que non é outra cousa que débeda.
Polo tanto, sinalou Santín, a luz vai seguir subindo e as
empresas deben artellar unha optimización dun gasto que en ocasións
supón o 60% dos seus custes operativos.