A dixitalización das administracións, a debate o 26 de xaneiro en Santiago
martes, 10 de xaneiro do 2017
O vindeiro xoves 26 de xaneiro Santiago vai
acoller unha xornada de debate e reflexión arredor da Administración
Electrónica e os seus principais retos a curto, medio e longo prazo.
O Seminario
Modernización Dixital das Administracións Públicas en Galicia
vén da man da Fundación SOCINFO e da revista Sociedade da
Información e conta co patrocinio das compañías galegas SIVSA,
especializada en servizos tecnolóxicos avanzados de xestión, e
ABANCA. Tamén se contará coa colaboración da Axencia para a
Modernización Tecnolóxica de Galicia (AMTEGA), o SERGAS, a
Deputación de Lugo e os Concellos de Vigo e Santiago. O programa de
actividades dará comezo ás 9.00 horas coa acreditación e entrega
de documentación. Logo, ás 9.30 horas, será a quenda de José
García Méndez, director da revista Sociedade da Información. Ás
9.40 intervirá a directora de AMTEGA, Mar Pereira.
A mesa primeira debate, prevista para as 10.00
horas, contará coa presenza de Almudena Chacón, interventora xeral
da Consellería de Facenda (Xunta), José María Franco (responsábel
de Solucións de Innovación, SIVSA) e Jorge Prado (xefe de Servizo
de Soporte e Implantación do SERGAS). Ás 12.00 horas, logo da
quenda de preguntas e o descanso para o café, será a quenda da mesa
segunda, na que intervirán Pablo Rivera, deputado da Área de
Innovación da Deputación de Lugo, e Javier Albertos Benayas,
responsábel de Modernización e Innovación do Consello de Vigo. Na
mesa terceira, a derradeira da xornada, participará Natalia Prieto,
directora xeral de Avaliación e Reforma Administrativa da
Consellería de Presidencia, e José María Barreiro, director xeral
de Función Pública da Consellería de Facenda. A clausura virá da
man do alcalde de Santiago, Martiño Noriega.
Segundo informa a organización, o audio do evento
será envorcado logo da celebración da actividade na web de SOCINFO,
podéndose acceder de balde ás intervencións individuais de cada un
dos relatores. Tamén se pendurará na web a presentación ou
documentación utilizada polos participantes nas mesas. Ademais,
realizarase un resumo do evento que se publicará en formato revista
na web de SOCINFO.
O seminario celebrarase no Edificio Abanca da
praza de Cervantes, en Santiago. A inscrición no evento é de balde
para funcionarios de sector público e empresas privadas non
tecnolóxicas, nin consultoras. A inscrición de persoas de sector
privado tecnolóxico ou consultor ten un custo de 199 euros (IVE
incluído).