A galega CINFO fixo realidade a retransmisión dos Goya con tecnoloxía multicámara
luns, 8 de febreiro do 2016
CINFO,
filial da operadora de raizame galega R centrada no vídeo
intelixente e no descubrimento de contidos, fixo posíbel un dos
principais puntos fortes da pasada cerimonia dos Goya (a edición
30), celebrada este pasado sábado e retransmitida en exclusiva por
RTVE. Pois ben, nesta nova entrega de galardóns do cinema e o
audiovisual estatal, contouse coa tecnoloxía de CINFO para dar forma
ao que sería, en palabras da firma, “o primeiro evento directo
emitido en España en modo multicámara para televisión dixital con
conexión a Internet, HbbTV”.
Segundo
engaden fontes da empresa, con esta tecnoloxía multicámara o
espectador puido decidir cal dos seis planos simultáneos que se
achegaban na retransmisión do evento ficaba no seu televisor. Tamén
se lle subministrou a opción de manter as seis xanelas abertas, ou
ben (para os máis tradicionais) optar pola retransmisión ao uso.
Como
lembraremos, CINFO
foi recentemente noticia, tamén, pola compra de Syntheractive,
start-up
galega
con sede no CITIC e adicada ao fornecemento de tecnoloxía
audiovisual avanzada. Por exemplo a
plataforma Synthetrick, concibida para crear (en tempo real),
executar e entregar vídeo sintético interactivo.
Volvendo
á experiencia deste sábado nos Goya e os recursos que a fixeron
posíbel, sinalar que estes están ao alcance da man dos espectadores
que teñan unha televisión compatíbel con HbbTV (TDT híbrida)
conectada a Internet. Para tirarlle partido, cómpre que premamos no
mando o botón vermello das aplicacións interactivas de TVE a
acceder así ao menú de navegación, logo teremos que elixir os
diferentes planos do acontecemento que se estea a retransmitir con
esta tecnoloxía, neste caso concreto que nos ocupa a cerimonia dos
Goya. “Cunha simple pulsación”, engadiu CINFO, “os
espectadores da entrega dos premios do cinema puideron fixar unha das
cámaras ou, cos botóns de dirección, desprazarse a outras cámaras
para ter unha perspectiva máis variada”.
Un
dos puntos fortes da tecnoloxía de CINFO baséase na “redución do
tempo de resposta ou latencia nos cambios de escena”, que segundo a
empresa “redúcese a unhas milésimas de segundo”. Polo tanto,
poderemos cambiar de punto de vista de maneira “fluída e
instantánea”, converténdonos “en realizadores na nosa propia
casa”.
Como
resultado da aplicación na gala da tecnoloxía multicámara
interactiva de CINFO, o público nos seus televisores puido centrar a
atención, “máis que nunca”, no escenario, “pero tamén no
patio de butacas para captar as reaccións de gañadores, candidatos
e a equipa de cada unha das producións nomeadas”. Durante
a emisión, 26.000 fogares conectáronse unha media de 2,5 veces,
multiplicando nalgún momento por dez os resultados do ano pasado.
Segundo fontes de CINFO, as empresas
implicadas na produción e os espectadores cualificaron a experiencia
do sábado de “experiencia nova e enriquecedora” para
proporcionar unha visión máis completa e personalizada do evento.