A galega Nanogap reforza o seu espallamento coa posta a punto do seu laboratorio de California
xoves, 16 de abril do 2015
A empresa galega Nanogap,
referente no deseño de nanofibras de prata, vén de dar pasos de
xigante no seu proceso de afianzamento en novos mercados,
principalmente no dos Estados Unidos, e máis polo miúdo no seu
centro de operacións tecnolóxico: California. En detalle, Nanogap
conta xa cun laboratorio de seu en Richmond. Para este proceso de
internacionalización, a empresa galega contou co apoio (dende os
seus comezos) de Unirisco, a sociedade de capital risco das nosas
universidades. Lembrar que as nanofibras, unha das
bases da actividade de Nanogap, úsanse no deseño de pantallas
táctiles para dispositivos intelixentes e tabletas.
A firma xurdiu en 2006
como unha spin-off da Universidade de Santiago, contando
arestora con sede principal en Milladoiro, Ames. A tecnoloxía
sub-nanométrica é a base da súa actividade na planta de
California.
Respecto ás cifras da
súa traxectoria recente, no último ano Nanogap incrementou nun 25%
o seu persoal, integrado por un equipo de 30 profesionais; na súa
maioría físicos, químicos e enxeñeiros químicos. A compañía
posúe clientes en Europa, Estados Unidos e Xapón. No últimos tres
anos a súa facturación incrementouse un 75% de media anual, e
recentemente pechou unha nova rolda de financiamento por valor de 2,2
millóns de euros cos seus investidores: Unirisco, sociedade de
capital risco participada polo tres universidades galegas, entidades
financeiras e grupos empresariais (Abanca, Banco Pastor, Banco
Portugués de Investimento, Construtora San José, Inditex, R e
Consorcio da Zona Franca de Vigo); Uninvest, sociedade xestora de
entidades de capital risco participada por Unirisco; e Xesgalicia,
sociedade de capital risco da Xunta de Galicia; rolda á que se sumou
Caixa Capital Risc, xestora de capital risco de La Caixa.
- Tatiana López, conselleira delegada da empresa
Ao fío da actividade da
firma e os seus obxectivos, a súa conselleira delegada, Tatiana
López, explica que “o nanómetro é a unidade de lonxitude
equivalente á millonésima parte dun milímetro”. E engade: “Cando
o material é tan pequeno aparecen propiedades sorprendentes que non
existen a escalas máis grandes, estes materiais amosan unha gran
actividade a moi baixas concentracións e ofrecen un amplo abano de
potenciais aplicacións”.
A tecnoloxía que
desenvolve Nanogap, comenta, é un “ingrediente esencial” para o
desenvolvemento de múltiples aplicacións nos eidos máis diversos.
Así, pódense destinar para a fabricación de pantallas de
televisores curvas e flexíbeis; pantallas de todo tipo de
dispositivos móbiles e electrónicos tamén flexíbeis; ou para
dispositivos de iluminación LED flexíbeis, fabricados mediante
electrónica impresa. Trátase, en palabras dos responsábeis da
firma galega, “dunha materia prima con múltiples aplicacións”.
Por exemplo: circuítos impresos, sensores, adhesivos condutores para
a industria aeronáutica, etc. Ademais, os materiais desenvolvidos
pola empresa son útiles na creación de circuítos electrónicos
impresos para a súa aplicación en antenas RFID, cuxo sinal permite
localizar un produto concreto. Así nolo conta David Fernández,
responsábel de Innovación: “É como un código de barras que se
pode ler a distancia; por exemplo detéctase a entrada e saída de
produtos nun almacén e vanse rexistrando nun computador de maneira
automática, sen necesidade de escanealos de maneira individual”.
Outra das súas
aplicacións é o desenvolvemento de sensores de caducidade en
alimentación, mediante a incorporación nos envases de sensores
electroquímicos. Tamén serven para integrar novos sensores de
diagnóstico dirixidos á detección precoz de doenzas e a evitar
falsos positivos, mediante o emprego de materiais que emiten sinais
ante a presenza dunha anomalía no organismo.
En relación á industria
aeronáutica, colaboradores da empresa desenvolveron un adhesivo
condutor para substituír as soldaduras de chumbo, que son moi
contaminantes, en circuítos electrónicos, desenvolvemento baseado
na tecnoloxía de Nanogap.
Respecto da súa
capacidade de xerar tecnoloxía propia, sinala que a empresa solicita
cada ano, como mínimo, unha nova patente. Nestes intres conta cunha
ducia delas presentadas, das cales catro xa lle foron concedidas en
varios varios países de Europa, Estados Unidos e Asia. Segundo
afirman os responsábeis da empresa, unha das claves do éxito é
contar “cunha tecnoloxía única en AQC (Clústeres Cuánticos
Atómicos), que é a base de todas as súas patentes”. Trátase,
informan, de partículas inferiores a 1 nanómetro, agrupacións de
átomos que presentan múltiples aplicacións que só é quen de
fabricar a escala industrial, explican, a empresa galega Nanogap.