A galega Twin Shoes leva a súa aplicación Como saber se lle gusto a 41 países
martes, 25 de febreiro do 2014
A empresa galega Twin
Shoes, da
que falamos con motivo da súa multitudinaria e festiva presentación
e (recentemente) do lanzamento
xunto coa tamén galega Invbit dunha interesante aplicación para
axudarnos a atopar parella, vén de facer reconto do acadado até
o de agora, en materia de seguimento e repercusión, pola devandita
aplicación. Como lembraremos, esta ferramenta (de nome Como
saber se lle gusto) é un pioneiro recurso que é quen de
detectar o grao de atracción persoal entre dúas persoas. E todo
isto, din os responsábeis de Twin Shoes, “de xeito sinxelo,
divertido e de balde”. Pois ben, a aplicación está a ser todo un
éxito. De feito, xa foi obxecto de 1.000 descargas, en apenas unha
semana e dende 41 países, sobre todo do ámbito iberoamericano.
Entre as comunidades en
liña que máis seguimento están a facer do servizo atópase como
era de supoñer a española, pero tamén está a ser descargada con
cifras salientábeis dende México, Chile, Brasil e Estados Unidos.
Para os responsábeis deste novo recursos de comunicación, cuxo
lanzamento coincidiu (non casualmente) coa pasada celebración do Día
de San Valentín, a ferramenta está a amosar un importante potencial
para pór en contacto a unhas persoas con outras, entre outras cousas
porque consegue “interpretar moitos dos sinais de atracción que
poden ser indicativo do que máis tarde se pode converter nunha
historia de amor”.
Como lembraremos, a app
achega varias vieiros para coñecer este grao de atracción entre
usuarios, ben avaliando unha mensaxe de WhatsApp, ben unha chamada
telefónica ou, ben tirando partido da linguaxe corporal cando a
persoa desexada está preto. Tamén se fai uso dunha enquisa para
acadar a puntuación do interese sentimental que unha persoa sente
pola outra. A aplicación, dispoñíbel para Android, atópase a
disposición dos usuarios no Google Play de forma gratuíta.