A plataforma Mancomun.org sinala que a presenza do software libre nas empresas TIC e no sector público galego é “especialmente significativa”
luns, 18 de decembro do 2006
A xulgar polos máis recentes datos
achegados pola plataforma Mancomun.org (integrada pola Consellería de Innovación
e os grupos de usuarios de software libre de Galiza), semella que están a
quedar xa lonxe os tempos nos que todo o mundo falaba ben dos programas
informáticos de código aberto pero moi poucos os usaba.
Eran tempos (se cadra non moi lonxanos, se cadra aínda vixentes nalgúns
sectores) en que unha boa parte de nós ficabamos na superficie das cousas,
imaxinando que apostar polo software libre era algo así como ingresar nalgún
tipo de listaxe negra. Podías recibir palmadiñas nas costas á saída dun
congreso no que fixeses fincapé nas moitas vantaxes desta alternativa
informática, pero xa podías ir tirando o móbil ó lixo, porque ninguén che ía
chamar para pedirche máis consellos. Porén, nada máis lonxe da realidade.
O navegador Firefox ábrese
camiño de xeito espectacular, o Open Office na nosa lingua é unha realidade
en moitos computadores e cada día xorden máis iniciativas que lle dan a razón
ós tolos que levan anos apostando pola
liberdade no software e que lle auguraron algo tan sinxelo como un futuro.
Ademais, Mancomun.org vén de achegar o seguinte dato: o emprego de software
libre medra “de xeito significativo” en empresas do sector tecnolóxico,
concellos (32%) e centros de ensino (20%), gozando ademais dunha imaxe
excelente na meirande parte dos sectores.
Ademais, en 2006 incrementáronse as actividades formativas e divulgativas
relacionadas co código aberto con respecto ó ano anterior.
Estes e outros datos figuran na publicación O
Software Libre nas entidades de Galiza, onde se pon de manifesto (entre
outros feitos) un certo desequilibrio no que se refire ó emprego de programas
de código aberto en tódolos elos da cadea de produción das empresas
tecnolóxicas galegas.
Así, “a maior parte das empresas TIC usan
estes ferramentas libres para desenvolver os seus produtos e servizos pero, sen
embargo, son reticentes a establecer novas liñas de negocio con elas e nelas”.
Sexa como sexa, e malia o gran descoñecemento que aínda existe sobre as
vantaxes destes programas entre as pequenas e medianas empresas non
tecnolóxicas (onde o open source ten
unha presenza do 10%) e nunha boa porta dos centros educativos (onde a ten do
20%), Galiza ocupa un lugar salientable no uso destas ferramentas a nivel
español: é a cuarta comunidade do Estado en empresas desenvolvedoras de
produtos de Software Libre.