AGASOL achega a xornada colaboraTIC.gal para impulsar ao máximo a colaboración empresarial
luns, 23 de maio do 2016
A Asociación Galega de
Empresas de Software Libre (AGASOL) quere habilitar novos espazos
para a colaboración entre empresas e profesionais: espazos onde para
coñecerse cooperaren coma se as fórmulas de traballo da comunidade
internacional de tecnoloxías abertas se transformaran en recursos
visíbeis e escenarios concretos. Co fin de impulsar este propósito,
o vindeiro 17 de xuño celébrase a xornada colaboraTIC.gal.
AGASOL está a facer un chamamento ás nosas compañías e
profesionais para presentar nesta actividade cadanseus
“proxectos/ideas/empresas”.
Proxectos a asociación, onde “a maridaxe software libre-empresa
sexa chave”. A previsión é dar acubillo “a algunhas das
mellores experiencias de colaboración entre software e outros eidos
a través de interesantes mesas de experiencias”.
A cita será o 17 de xuño con
horario de 9.30 a 15.00 horas (asistencia de balde, previa inscrición
na páxina web, rematando o prazo o último día de maio). Celébrase
na Sala Eismann da Cidade da Cultura en Santiago e contará coa colaboración da Axencia para a Modernización Tecnolóxica de Galicia (AMTEGA). A xornada artéllase
en dúas partes. A primeira, a de mañá, corresponderá á
presentación de boas prácticas no eido da cooperación
entre o software libre e o tecido empresarial. A asistencia a esta
vertente da xornada é libre e gratuíta pudendo asistir calquera
persoa interesada en coñecer novos modelos de colaboración e
traballo entre o eido das tecnoloxías abertas e outros sectores
empresariais. A outra vertente da xornada é a de tarde, o espazo
Speed-dating. Trátase dun espazo dirixido a favorecer
encontros entre empresas centradas no software libre e outros eidos
do tecido empresarial (industrial, deseño, agro-gandeiro, pesqueiro,
etc). Segundo lembra a organización, só poderán asistir ao
Speed-dating aquelas empresas/proxectos seleccionados. Para
participar nel, sinala AGASOL, “é preciso adaptarse ás presentes
bases e cubrir un formulario de inscrición”. As solicitudes
recibidas serán valoradas en base a unha serie de criterios
previamente definidos. Seleccionaranse 10 empresas/proxectos de
software libre e 10 empresas/proxectos doutros eidos.
Poderán participar no encontro, por parte do sector
open source que representa AGASOL, membros de empresas galegas
(e profesionais autónomos) desenvolvedoras e/ou comercializadoras de
solucións en código aberto. Por parte doutros sectores (non
pertencentes ao sector tecnolóxico en sentido estrito) estarán en
disposición de concorrer representantes de empresas galegas (e
profesionais autónomos) de calquera sector que consideren que as
tecnoloxías libres poden ser un bo aliado para o desenvolvemento de
proxectos e accións conxuntas.