AGESTIC presenta un proxecto en liña para facilitar ás nosas mulleres a busca de traballo

venres, 24 de febreiro do 2012 Fernando Sarasketa

A sede da Confederación de Empresarios de Lugo acolleu este venres a presentación dun proxecto en liña dirixido, entre outras cousas, a facilitármonos a obtención dun posto de traballo. Trátase de Destino Emprego, iniciativa que vén da man da Asociación Galega de Empresas TIC, AGESTIC, ao abeiro da estratexia do Ministerio de Industria para afianzar as redes a tódolos niveis sociais: o Plan Avanza. O proxecto, segundo se fixo saber en Lugo, está especialmente dirixido ás mulleres galegas e é cen por cen de balde e cen por cen en liña.
Isto significa que podemos tirar partido das súas vantaxes sen necesidade de acudir a un espazo físico de formación e asesoramento, cousa moi de agradecer para a sociedade galega, especialmente dispersa e con forte presenza no rural. Segundo fixeron saber os responsábeis do programa, estamos ante “unha experiencia piloto moi innovadora que, sobre a base dos servizos dixitais dispoñíbeis na Rede, propón un itinerario en liña en forma de mapa de metro para fomentar e mellorar o emprego, o autoemprego e o espírito empresarial das mulleres que estean en situación de desemprego e desexen procurar traballo ou facer realidade un proxecto de mercado”.
Na presentación celebrada en Lugo, na que participou directamente o presidente de AGESTIC, José María López Bourio, fíxose un percorrido polos métodos e polos recursos a empregar pola iniciativa, que van dende as titorías personalizadas ao asesoramento en materia de formación TIC. Tamén se contribuirá a facilitar a conciliación da vida familiar e laboral, fomentarase a posta en marcha de empresas de base dixital e a participación da muller na Sociedade da Información, etc. O proxecto, sinalouse, é un dos dez concedidos na convocatoria Avanza do pasado ano en canto a igualdade de xénero e emprendemento, cousa na que xa ten experiencia AGESTIC (co seu proxecto Nin máis nin menos, por exemplo).

PUBLICIDADE