AMTEGA e o CPEIG lanzan a web de Rapaciñ@s con dominio galego
martes, 3 de xaneiro do 2017
O Colexio Profesional
de Enxeñaría en Informática de Galicia comezou o ano con
divulgación TIC para os máis pequenos. Se
onte falabamos das súas actividades desenvolvidas para as nenas e
nenos ingresadas/os no CHUS, hoxe é a quenda de salientar
Rapaciñ@s, unha
iniciativa que xa foi posta en marcha en 2015 pero que colle
agora novos folgos, co inicio de 2017, estreando páxina web de seu
con dúas entradas: www.rapacinos.gal
e www.rapacinas.gal. A páxina foi deseñada pola firma A Navalla Suíza.
A iniciativa, como lembraremos, vén da man do CPEIG e máis da
axencia AMTEGA. O seu obxectivo é achegar as tecnoloxías da
información ás crianzas dunha maneira responsábel, construtiva e
segura. Dito doutro xeito: trátase de fomentar os bos hábitos de
navegación e desenvolvemento dende as idades máis temperás.
Respecto
do
novo espazo web, trátase
dun espazo
accesíbel
e de doado emprego para usuarias e usuarios coñecementos técnicos
básicos. Abrangue os seguintes
contidos: personaxes fundamentais na historia da informática, 10
razóns para estudar informática, saídas profesionais, onde
realizar os estudos, consellos de navegación segura e o xogo A
quen te pareces?
Entre
os recursos que salientan o CPEIG e AMTEGA inclúese precisamente o
devandito xogo, unha proposta lúdica que consiste en divulgar casos
de éxito que amosan as vantaxes de apostarmos por unha carreira
tecnolóxica. O xogo fai fincapé en persoeiros e experiencias TIC
protagonizados por mulleres (e tamén por homes), sendo o seu
obxectivo fundamental loitar contra a fenda de xénero profesional no
ámbito das novas tecnoloxías (a fenda que impide por diversos
motivos discriminatorios a equiparación de sexos na profesión
dixital). O xogo, máis en detalle, sérvenos percorridos pola vida
de persoeiros referencias no ámbito tecnolóxico, “persoas
dotadas de talento, maxín, capacidade de emprendemento e
creatividade e que fixeron achegas decisivas na creación de
software, na ideación de Internet, na popularización das redes
sociais, na creación de novas aplicacións, na procura de
ferramentas dixitais máis libres e accesíbeis”, informan o CPEIG
e AMTEGA. Polo xogo en cuestión, “pasan” investigadoras do talle
de Ada Lovelace, Margaret Hamilton, Marissa Mayer, Anita Borg, Ana
María Prieto, Mitchell Baker, Ángela Ruiz, Radia Perlman ou Carol
Shaw.
Segunda edición
O programa Rapaciñ@s: a tecnoloxía ben segura, no que se insire o novo espazo web, percorreu xa durante dous anos toda Galicia con charlas informativas a cargo das colexiadas e colexiados do CPEIG e obradoiros infantís. Por unha banda, familias e tamén docentes atopan información e recursos de interese; por outra, nenas e nenos adquiren hábitos seguros para navegar na Rede e desenvolven a súa creatividade tecnolóxica a través de actividades pensadas para que se divirtan e aprendan. Alén destas charlas, organizáronse diferentes eventos na Cidade da Cultura con obradoiros tecnolóxicos para os cativos e conferencias de expertos en novas tecnoloxías dirixidas a pais e nais.