AMTEGA lanza o portal de recursos e iniciativas do Plan de Inclusión Dixital
luns, 30 de maio do 2016
O Plan de Inclusión
Dixital en Galicia 2020, impulsado por AMTEGA e cuxos
bloques de acción avanzamos o 21 de abril, segue a dar pasos
importantes no obxectivo de xuntar forzas contra a fenda dixital.
Primeiro, coa
resolución da axencia AMTEGA para impulsar a adhesión ao Plan de
“aliados dixitais”, ou sexa, entidades, empresas e
profesionais con vontade de participar no desenvolvemento dixital da
nosa terra e loitar a prol da inclusión tecnolóxica. Máis
tarde, comunicóusenos que a base de “aliados” xa ía alén da
cifra de 700. Agora, o organismo que dirixe Mar Pereira vén de
publicar o portal Faite
Dixit@l, a páxina que integra nun único espazo os
servizos, proxectos e actividades impulsadas no Plan de Inclusión
Dixital de Galicia 2020.
Segundo informa AMTEGA,
coa posta en marcha de faitedixital.xunta.gal,
a cidadanía “conta cun único punto de acceso ás distintas
iniciativas que se están a desenvolver en Galicia en torno aos tres
eixos principais do Plan, tanto os da alfabetización e a
capacitación dixitais, como o orientado ao impulso da innovación
social dixital”. O sitio en liña conta, para comezar, cunha
portada inicial onde se presenta o Plan así como a formación e os
proxectos dispoñíbeis en cada un dos tres eidos de actuación. O
resto do contido estrutúrase en cinco bloques: A Estratexia,
Os Aliados Dixitais, Os Servizos, Os Recursos e
A Actualidade.
No apartado da
Estratexia, a web ofrece toda a información relacionada con
Plan de Inclusión Dixital de Galicia: os seus valores, obxectivos,
os destinatarios, os servizos, así como o camiño percorrido cos
proxectos da Rede CeMIT e o Programa de Voluntariado Dixital, xa que
foron o punto de partida para posta en marcha do Plan.
O espazo dos Aliados
Dixitais explica os pasos para adherirse ao Plan como aliado
dixital e mostra os diferentes perfiles de aliados: mecenas,
referentes, menores, voluntarios e entidades colaboradoras, e as súas
achegas.
O bloque dos Servizos
presenta o catálogo de servizos dixitais dispoñíbeis tanto de
formación presencial, teleformación, certificación de competencias
dixitais en ofimática, proxectos e iniciativas singulares,
faladoiros e apoios dixitais.
En Recursos os
usuarios acceden aos diferentes tipos recursos que teñen a súa
disposición: a rede de aulas CeMIT, o mapa de e-Servizos de
inclusión dixital, a comunidade virtual do voluntariado dixital, o
espazo multimedia de aprendizaxe así coma contidos e publicacións
de interese. Finalmente a web tamén dispón dun apartado de
Actualidade, que permite acceder as novas e eventos,
proxectos, informes de interese en torno á inclusión dixital.
Máis de 700 aliados
Como lembraremos, o
Plan de Inclusión Dixital de Galicia 2020, presentado o pasado 18 de
maio ante os máis de 700 aliados cos que conta, busca “acadar unha
sociedade plenamente dixital formada e
capacitada no uso das tecnoloxías, capaz de explotar e aproveitar
todo o potencial das TIC a nivel persoal, profesional e relacional”.
Cun orzamento de máis de 7 millóns de euros en cinco anos o
Plan artéllase, en palabras de AMTEGA, “arredor dun novo modelo de
relación flexíbel e en rede, sustentado en alianzas dixitais entre
a Xunta de Galicia e os diferentes axentes do ecosistema dixital que
permitirá sumar capacidades, recursos e iniciativas”.