Agestic sensibiliza ós empresarios galegos en materia de innovación
xoves, 6 de novembro do 2008
O Delegado da Consellaría
de Innovación e Industria, José Luís Barcia, mailo presidente de Agestic, José María López Bourio, veñen de
presentar, esta mesma mañá, o Proxecto Difundeinnova, que promove a Asociación
Galega de Empresas de Tecnoloxías da Información e Telecomunicación (Agestic) a
prol do fomento da innovación nas pequenas e medianas empresas galegas.
O proxecto, que conta co financiamento da Consellaría de
Innovación a través das Axudas I+D+i dentro do Plan Galego de Investigación,
Desenvolvemento e Innovación Tecnolóxica 2006-2010, pretende sensibilizar ás
empresas en materia de innovación para facerlles ver aos seus responsables
máximos que “é algo rendible e necesario
para competir”.
Agestic pretende “difundir
a importancia que ten para as pequenas e medianas empresas galegas o feito de
investir en accións innovadoras de produto, de proceso ou de servizo”, a
través de 33 actuacións e 160 obradoiros levados a cabo nos Parques
Empresariais das catro provincias galegas en localidades como por exemplo
Guitiriz, Cervo, Muimenta, Ortigueira, Curtis, Fene, Ordes, O Grove, Moraña,
Lalín, Verín, Xinzo ou O Carballiño, entre outras.
O proxecto Difundeinnova lévase a cabo nunha unidade móbil
para facilitarlles o achegamento a tódolos empresarios sen excepción; está
equipada como unha oficina, con ordenadores e conexión a Internet, e conta cun
titor experto en innovación que guía aos empresarios e técnicos que se acheguen
ata alí en materia de innovación en situación de crise.
Asemade, os visitantes que visiten as unidades de
Difundeinnova, recibirán un Manual Guía Básico da Innovación a fin de que
poidan adoitar unha cultura innovadora e dediquen máis esforzos a esta área.
Os responsables do proxecto estiman chegar a unhas 1.000
empresas en toda a Comunidade.