Amparo Alonso defendeu una IA sustentábel e efectiva no Coruña Innovate Summit

A investigadora do Centro TIC da Universidade da Coruña (UDC), Amparo Alonso, participou o pasado venres 25 de outubro no Coruña Innovate Summit, un evento que reuniu startups, empresas e profesionais que están na vangarda das tecnoloxías disruptivas como a IA, a análise dos datos a gran escala (Big Data) e a aprendizaxe das máquinas (Machine Learning). O congreso, celebrado na Cidade das TIC, serviu para abordar o reto de transformar tanto as empresas como a sociedade no seu conxunto a través destas tecnoloxías innovadoras.
Amparo Alonso participou cunha conferencia titulada IA cun orzamento: frugal e sostíbel, na que subliñou a importancia de desenvolver solucións dixitais que, ademais de ser eficaces, sexan accesíbeis e respectuosas co medio ambiente. “A innovación non ten que ser custosa. A través dun enfoque sostíbel, podemos desenvolver tecnoloxías que teñan un impacto significativo na sociedade”, afirmou Alonso durante a súa intervención.
O Coruña Innovate Summit está organizado pola empresa DataSpartan e contou coa colaboración da Deputación da Coruña, o Clúster TIC Galicia, o Colexio Profesional de Enxeñaría Informática de Galicia, o Consorcio de Turismo da Coruña e o Centro de Servizos Avanzados (CSA). O evento celebrouse nun ambiente colaborativo, fomentando o intercambio de ideas e a creación de sinerxías entre os participantes.
A participación de Amparo Alonso e doutros expertos do mundo empresarial e académico, como Paco Nathan (Senzing), Dimitrios Athanasakis (AstraZeneca) e Fernando Manzanera Pérez (CT Ingenieros), permitiu afondar en cuestións clave relacionadas coa transformación dixital e o papel fundamental que xoga a innovación sostible no desenvolvemento de solucións tecnolóxicas accesibles.
O congreso iniciouse o 24 de outubro, coa intervención inaugural a cargo do reitor da UDC, Ricardo Cao, e da deputada de Industria, Empresa, Medio Ambiente, Emprego e Política Demográfica, Rosa Ana García López. Durante as dúas xornadas, os asistentes tiveron a oportunidade de coñecer de primeira man como as tecnoloxías máis innovadoras están a transformar os seus sectores, impulsando novas oportunidades e vantaxes competitivas en diversos ámbitos.