As Cámaras de Santiago e Coruña desenvolverán programas de innovación TIC na demarcación de Lugo
luns, 27 de xullo do 2015
As
Cámaras de Comercio de Santiago
e A Coruña
desenvolverán catro programas de innovación destinados a que as
PEME e autónomos da demarcación de Lugo tiren proveito das vantaxes
de incorporar as novas tecnoloxías ao seu seo. A medida, sinala o
ente compostelán, vén dada pola “imposibilidade da entidade
lucense de achegar os recursos materiais e humanos precisos para
levar a cabo as actuacións dos programas”. Por estes motivos, as
Cámaras de Santiago e A Coruña fixaron un acordo para desenvolver
os programas TIC Cámaras, InnoCámaras (Cámara da Coruña),
LeanCámaras e eAdministración (Cámara de Santiago).
Polo
que respecta ao programa LeanCámaras, unha das iniciativas que
levará a cabo a Cámara de Santiago, axuda ás PEME industriais a
mellorar a súa competitividade, mediante o desenvolvemento
subvencionado de Plans de
axuda á mellora baseados na metodoloxía Lean Manufacturing
para a adopción dunha cultura centrada na busca constante da
eficiencia. A empresa contará cun consultor experto en lean
manufacturing que a guiará
ao longo de todo o proceso de implantación do plan. Está financiado
ao 80% polo Fondo Europeo de Desenvolvemento Rexional (FEDER) da
Unión Europea e ao 20% pola Xunta de Galicia e as propias empresas
beneficiarias.
Segundo
sinala a Cámara de Santiago acerca de LeanCámaras, as empresas de
Lugo poderán reducir entre un 10 e un 30% os seus custos unitarios;
acadarán tamén un incremento da produtividade e mellorarán a
calidade do produto e os resultados na resolución de problemas,
entre outras cousas.
A
entidade compostelá será tamén a encargada de ofrecer ás empresas
de Lugo o programa eAdministración, orientado ao fomento das canles
e servizos de tramitación electrónica nas pequenas e medianas
empresas, microempresas e autónomos da demarcación. É unha
iniciativa co-financiada por fondos FEDER da Unión Europea. O
obxecto principal do programa é “fomentar o uso da
eAdministración, a facturación electrónica e a sinatura dixital
para achegar a Administración Pública ás empresas e maximizar a
mellora da súa produtividade e competitividade, a través de
servizos electrónicos completos”.
Este
programa ten unha fase de consultoría de mellora de procesos onde se
realizará un diagnóstico asistido e personalizado ás empresas
participantes. Trátase dunha análise dos procesos da empresa para
determinar os aspectos nos que a eAdministración pode contribuír á
mellora da produtividade e competitividade, facilitando a redución
de cargas administrativas, a axilidade nos procedementos e a
automatización de procesos que evidencien electrónicas
certificadas, entre outras cousas.