As cidades intelixentes estatais suspenden en participación cidadá
martes, 31 de maio do 2016
- Mahou e Varela son os autores do estudo sobre smart cities
Os profesores
da UVigo (Campus de Pontevedra, Facultade de Ciencias Sociais) Xosé
Mahou e Enrique Varela veñen de desenvolver unha investigación
sobre a calidade e o nivel de operatividade das iniciativas de
cidades intelixentes do ámbito estatal. O estudo avalía, en
total, os portais de 20 capitais de provincia. Segundo apuntan os
autores, fica moito traballo pendente por facer. De feito, din,
“estes espazos en liña non están a xerar contornas virtuais que
favorezan unha interacción fluída entre administración local e
cidadanía”. Ou sexa que boa parte dos obxectivos básicos deste
tipo de iniciativas aínda están por cumprir. Entre as cidades con
mellores indicadores nos mecanismos de participación en liña
figuran Zaragoza, Barcelona e Madrid. Pola contra, a única cidade
galega analizada, A Coruña, acada unha nota negativa.
Mahou e Varela,
investigadores da Área de Ciencia Política e da
Administración-Observatorio da Gobernanza, tentaron para o seu
estudo identificar o nivel de desenvolvemento dos mecanismos de
participación nos portais institucionais das principais smart
cities españolas. O obxectivo era identificar o nivel de impulso
da participación electrónica nas paxinas municipais. A
investigación, que vén de ser recollida en Innovation and
Opportunities for Citizen Participation in Spanish Smart Cities (un
dos capítulos incluídos no libro colectivo Smarter as the New
Urban Agenda, da editorial Springer), achega unha conclusión
básica e principal: “Aínda hai moito traballo por facer”. Os
autores do traballo chegaron a este punto logo de avaliar o grao de
usabilidade dos portais institucionais das 20 cidades analizadas,
pertencentes ás catro categorías (cidades top, aspirantes,
xogadoras e seguidoras) que abrangue a clasificación elaborada por
ICD. En liñas xerais, explican, os portais destas cidades destacaron
por seren “sitios fundamentalmente informativos”, que deixan
“escasa marxe a que a cidadanía colabore na elaboración das
políticas públicas e na produción e provisión de bens e servizos
públicos”.
Porén, os investigadores tamén recoñecen que
existen “importantes diferenzas entre as cidades analizadas”,
entre as que salienta a web “con múltiples dispositivos de
participación cidadá” de Zaragoza, que supera ao resto de cidades
en todas as dimensións analizadas. Concretamente, a capital de
Aragón, inserida na categoría de aspirantes de ICD, obtén 102,5
puntos dos 135,5 posibles seguindo os indicadores fixados para este
estudo, por diante de dúas urbes do top 5 do ránking,
Barcelona e Madrid. “A primeira”, apuntan os autores do informe,
“destaca en atención á cidadanía e en servizos de administración
electrónica”, mentres que a capital de España “mantén un
promedio relativamente alto en todos os apartados”, en especial no
de goberno aberto. Tamén é de salientar nesta análise outra das
cidades da categoría top,
Santander. Máis polo miúdo no relativo á participación de
“iniciativas smart city”, grazas á web coa que conta para
“o intercambio de ideas neste ámbito entre cidadanía e
administración local”.
No outro lado da balanza atópanse
cidades como Murcia, Logroño, Burgos ou Castellón, todas elas da
categoría “xogadores”, aquelas que se considera “que están
avanzando no camiño axeitado, pero que non alcanzan os 40 puntos
nesta medición”. Cifra á que tampouco chega á única capital
galega incluída no estudo, A Coruña, que obtén malos resultados
“tanto en atención á cidadanía como en acceso ao goberno
aberto”.