As máis de 8.000 fichas de Patrimoniogalego.net incorporan xa modelos en 3D

A plataforma Patrimoniogalego.net, o catálogo social da nosa riqueza inmóbel (amais de ser unha fronte común para reivindicar a conservación do tesouro artístico espallado polos nosos concellos: pazos, casas, cruceiros, fontes, castelos, ingresas, capelas, etc), vén de dar un importante paso adiante (tecnolóxico, de uso e de contido) coa incorporación ás súas fichas de fotogrametrías 3D. Esta inclusión, informan os responsábeis de Patrimoniogalego.net, é pioneira na nosa terra nun acubillo en liño destas características.
O resultado, máis en detalle, son modelos dos bens culturais catalogados en tres dimensións e que permiten a exploración virtual dos elementos inventariados. “Os catalogadores”, engaden os impulsores da páxina, “dispoñen agora dun campo opcional destinado á inclusión de réplicas tridimensionais virtuais dos bens; así, xunto coa descrición textual e fotográfica, as novas posibilidades tecnolóxicas ofrecen a oportunidade de coñecer máis en profundidade un ben cultural e mailo seu estado actual”.
Segundo apuntan, a incorporación de modelos 3D a partir de fotogrametría é “unha técnica en auxe de gran popularidade que posibilita reproducir de maneira tridimensional calquera figura real a partir dunha colección de fotografías”. O software empregado para tal fin (hoxe en día case todo el de balde e sen licenzas pechadas) deixa marxe aos catalogadores para elaboraren modelos e incorporalos ás fichas co fin de obter “unha representación pormenorizada dos mesmos”. O resultado de todo isto, de cara a nós os usuarios é o privilexio de vermos as obras acubilladas en todos os seus detalles, amais de podermos viralas en calquera sentido para velas dende o ángulo que desexemos.
Entre os bens rexistrados nos que xa é unha realidade a devandita tecnoloxía atópanse (entre outros) o petróglifo da Pedra da Serpe (na imaxe) e a Pedrafita de Lamilo de Arriba, ambos en Boiro, os petróglifos de Boallo e do Castriño de Conxo, en Vimianzo e en Santiago respectivamente, ou a Anta de Abuíme, no Saviñao. Segundo informan dende Patrimoniogalego.net, estes exemplos da arte rupestre galega ou dos monumentos megalíticos figuran entre os primeiros dos que se realizou unha réplica virtual, aos que seguiran outros de distinta tipoloxía. “A idea”, manifestan, “é que os catalogadores de patrimoniogalego.net se animen de xeito progresivo a facer uso desta nova técnica á hora de cubrir os distintos campos das fichas dos bens culturais”.