Até 150 congresistas pasaron polas xornadas Cidades Dixitais organizadas por CONETIC en Santiago
xoves, 23 de abril do 2015
Finalmente as iniciativas
galegas en materia de Smart Cities tiveron un escaparate de
primeira liña (un escaparate transoceánico) na terceira edición do
Congreso
Cidades Dixitais, organizado en Compostela por CONETIC
co apoio da asociación Ineo, clausurado este mércores logo de
ter pasado polas súas sesións máis de 150 congresistas, 29
relatores expertos no catro temáticas vertebrais do evento:
accesibilidade, seguridade, transporte e refugallos. Segundo informa
a devandita confederación estatal, o evento tamén acubillou a
presentación de seis casos de éxito e, a maiores, dez cidades de
ámbalas beiras do Atlántico deron a coñecer as súas iniciativas
smart para os vindeiros meses, entre as que se contaron
Valencia, Ourense, Bilbao, Santiago de Compostela, A Coruña, Tijuana
ou Medellín, amais da eurocidade galego-lusa Verín-Chaves. Os
relatorios foron retransmitidos vía videoconferencia (rexistráronse
máis de 1.000 accesos de IP diferentes).
Segundo engade CONETIC,
durante os dous días nos que se celebrou o encontro amosáronse as
futuras tendencias do sector TIC, “converténdose Santiago en
centro de debate sobre as posibilidades de desenvolvemento das
cidades grazas á aplicación da tecnoloxía, así como a
oportunidade de negocio que ofrecen as novas Cidades Dixitais para as
empresas do sector”.
Durante a primeira
xornada, logo
das presentacións de Jorge Cebreiros e Víctor Calvo Sotelo, o
congreso ofreceu un panel financeiro no que tanto o Instituto de
Crédito Oficial, ICO, como o CDTI puideron expor as súas fórmulas
de apoio ao investimento empresarial. Tamén se contou coa
participación do Banco para o Desenvolvemento de América Latina,
que nomeou e salientou as empresas que participan na execución dos
seus proxectos de impulso socioeconómico de América Latina.
Na primeira mesa de
debate analizouse o transporte intelixente de persoas e mercadorías.
Os relatores destacaron que “debe haber unha cultura onde a
participación cidadá teña relevancia e poidan ser tamén creadores
de solucións sobre transporte en base ás súas necesidades reais”.
Elkir Echeverri, director de Prospectiva de Ruta N de Medellín
sinalou que “unha cidade ten un transporte intelixente non cando
todo o mundo ten automóbiles se non cando toda a poboación
incluídas as rendas altas, utilizan o transporte público; con iso
ademais conseguiremos que o transporte sexa sustentábel”.
Durante a segunda mesa de
debate (sobre accesibilidade nas cidades e os fogares), os relatores
lembraron ás administracións que a poboación non pode ser
discriminada polo lugar onde vive ou porque sexan cidadáns con
limitacións físicas ou sensoriais. “Hai que ter en conta aos
cidadáns na súa diversidade e a día de hoxe as oportunidades de
expresión dos cidadáns son moi escasas e atopámonos con servizos
intelixentes que son inaccesíbeis para unha parte da cidadanía”,
recordouse.
Na terceira mesa de
debate (seguridade na Smarts Cities) os relatores explicaron
que “a seguridade é algo transversal a calquera tecnoloxía”. E
engadiron: “O reto na seguridade é acadar sinerxías absolutas
entre os axentes públicos e privados”. Segundo fixeron saber, “os
gobernos teñen que tomar medidas para concienciar e educar á
poboación nos riscos de seguridade aos que se enfrontan para elevar
a súa protección e activar medidas de seguridade”.
Na última mesa de debate
(xestión e reaproveitamento de refugallos), os participantes
coincidiron en salientar que a intelixencia ambiental (smart
enviroment) abre espazos de oportunidade para a aplicación das
tecnoloxías en entre áreas como a responsabilidade social
empresarial (podendo aplicar tecnoloxías de gamificación
para xerar hábitos nas persoas e organizacións), a normalización e
a lexislación (facendo máis doado o seguimento dos residuos) e no
ciclo de vida dos refugallos (construíndo produtos ecolóxicos en
toda a súa vida útil).