Bahía abrirá en Santander o seu primeiro centro de desenvolvemento de software fóra de Galicia
luns, 17 de decembro do 2018
A
compañía galega Bahía
Software está dar importantes pasos en excelencia e crecemento.
Á moi recente estrea das novas instalacións no polígono de
Milladoiro, un innovador e referencial espazo de traballo nos lofts
da rúa das Hedras, cómpre engadir agora a vindeira apertura en
Santander do que sería o seu primeiro Centro de Desenvolvemento de
Software fóra de Galicia. Esta nova sede sumarase ás ditas
dependencias e máis ás de Ourense e A Coruña. Polo que se refire
ao negocio da compañía, tamén achega boas novas: a empresa
consolidouse no mercado estatal cunha previsión de medre do 30% este
ano.
O
Centro de Desenvolvemento de Software de Bahía na capital cántabra
contará cun equipo de traballo formado por entre 6 e 10
profesionais. En palabras do socio-director, da firma galega, Gustavo
Martín, “despois de máis de 10 anos de actividade continuada na
Comunidade, queremos apostar polo extraordinario talento que hai en
Cantabria e que esta nova oficina se convirta, a curto prazo, nunha
nova factoría de desenvolvemento e I+D+i no norte de España”.
Polo
que se refire ao negocio xerado en 2018, a compañía prevé pechar
ano, como dixemos, cun medre do 30 %, acadando os 8 millóns de euros
de facturación. Estas cifras positivas veñen por, entre outras
cousas, o fortalecemento da súa presenza en clientes de banca,
retail e loxística, ademais da súa liña de desenvolvemento,
soporte e mantemento integral de sistemas de información de
aplicacións sanitarias, que levou a Bahía a operar para máis de
100 centros hospitalarios públicos e privados españois, así como a
xestionar a imaxe médica dos sistemas públicos de saúde de
Cantabria, Galicia e Aragón.
Ao
devandito cómpre engadir o despregue en 2018 de novas solucións
propias, que son, en palabras da empresa galega, “produto do
investimento en I+D+i por un importe duns 4 millóns de euros nos
últimos 5 anos”. Trátase de tecnoloxías como o Sistema de
Xestión de Tumores ou o Sistema Avanzado para a Planificación e
Xestión do Bloque Cirúrxico.