Balidea deseña a aplicación móbil de Spin 2016

mércores, 28 de setembro do 2016 Redacción

A empresa galega Balidea vén de deseñar e desenvolver a aplicación do evento Spin 2016, o gran encontro do emprendemento xuvenil e universitario (de alcance transnacional) que se celebra esta semana en Santiago de Compostela, da man da entidade RedEmprendia. Segundo informa a firma Balidea, con sede precisamente en Compostela, a ferramenta está baseada no produto marco Eilo, unha ferramenta móbil desenvolvida pola propia compañía en colaboración con S-REC e Situm e fundamentada nun sistema innovador para tabletas e dispositivos intelixentes: un sistema que facilita a relación dos usuarios con edificios intelixentes. Entre outras cousas, permítelles localizarse xeográfica e tecnoloxicamente sobre un mapa exterior ou interior a un edificio e consultar diferentes puntos de interese previamente fixados.
Por outra banda, a aplicación informa aos usuarios de todo o que lles pode resultar de interese segundo os seus intereses e preferencias (fixadas por eles mesmos, tamén, previamente). A ferramenta, engade Balidea, ten moito potencial para afacerse ás características propias de todo tipo de escenarios, dende museos e aeroportos até recintos feirais ou centros comerciais. A adaptación para Spin 2016, dispoñíbel para Android e iOS, é a estrea desta vertente.
Segundo explica con máis detalle Balidea, a app dispón dun sistema intelixente de localización que nos permite situarnos dentro do recinto do evento, neste caso concreto a Cidade da Cultura, “facilitándonos a mellor ruta para chegar en cada momento ao lugar do noso interese, ben sexa un expositor concreto, os espazos de actividades ou outras zonas do edificio que ofrecen servizos ao encontro”.
A aplicación está artellada en dous grandes apartados (expositores e axenda), achegando información específica de cada un dos espazos da parte expositiva do evento e de todas as actividades do programa referidas a obradoiros, conferencias, relatores, seminarios ou networking. Ademais, podemos chegar ao contido desexado por dúas vías diferentes, ben de forma directa a través dun menú ou ben filtrando por tipo de expositor e actividade. Tamén se nos achega a posibilidade de configurar a nosa axenda engadindo as actividades do noso interese no calendario.

PUBLICIDADE