Bota a camiñar este sábado o programa Trekker Monte Pindo
xoves, 12 de xaneiro do 2017
O programa Trekker
Monte Pindo, unha iniciativa tecnolóxico-paisaxística de
protección e de recoñecemento na
que participa activamente o xigante de Internet Google, colle
novos e importantes folgos. Segundo nos conta a Asociación Monte
Pindo, firme valedora desta paraxe do concello de Carnota e da súa
blindaxe medio-ambiental e paisaxística como Parque Natural, o dito
programa arrinca esta fin de semana cunha xuntanza á que están
convocados todos aqueles voluntarios que desexen botar unha man na
visualización, salvagarda e rexistro do macizo carnotán. A cita
será no salón de actos do consistorio, o sábado 14 ás 20.00
horas. Como lembraremos, en Trekker Monte Pindo colaboran Google
e Monte Pindo Parque Natural co fin de pendurar en Google
Maps e Google
Earth as distintas rutas do Monte Pindo e da súa contorna.
Con esta reunión, a
Asociación Monte Pindo espera obter unha proposta de calendario das
que serán as tarefas de mapeo físico das rutas, que se prevé
que se desenvolvan ao longo do mes de abril. Segundo informa a dita
entidade, esta proposición de datas de roteiros será remitida a
Google para a súa aprobación, ao que seguirá a sinatura dun acordo
de colaboración “no que serán concretados todos os aspectos
legais da iniciativa”. Con esta, a asociación agarda fornecer aos
internautas, este mesmo ano, os recursos precisos para percorreren
desde calquera punto do mundo as rutas que percorren o Monte Pindo, o
municipio de Carnota e a súa contorna. Isto farase a través de
andainas polas distintas sendas con voluntarios carrexando a cámara
Google Street View e rexistrando desta maneira cada detalle das
mesmas e da paisaxe pola que discorren.
Segundo lembra a
entidade con sede en Carnota, a día de hoxe xa hai inscritos no
programa Trekker Monte Pindo unha ducia de persoas voluntarias, ás
cales se dirixe prioritariamente o convite, “mais a reunión do
sábado ten carácter aberto polo que calquera persoa pode asistir”.
Lembrar que os apoios
de Google non se limitan ao subministro deste material e a
dispoñibilidade dos seus servizos. En outubro deste ano, o xigante
buscador recoñeceu oficialmente
a existencia do Parque Natural do Monte Pindo. E fíxoo, segundo
informou a asociación equiparándoo en importancia con outros
parques naturais “oficiais” existentes na nosa terra.