Carballo ponse no epicentro da creación de contidos dixitais co seu Festival Interplay
venres, 17 de abril do 2015
Finalmente comezou en
Carballo a edición 2015
do Festival Interplay (CIP15), que é un certame pioneiro a nivel
galego e estatal sobre un fenómeno tecnolóxico e audiovisual que
non só está aquí para ficar, senón para espallarse e meterse nos
nosos fogares: o fenómeno das webseries. O festival, que se
desenvolve no Pazo da Cultura e no Fórum Carballo até o 18 de
abril, constitúe en boa medida un escenario duplo: un espazo para a
proxección de obras audiovisuais de vangarda (que cinguen as
características das series tradicionais cos modernos xeitos de
distribución e fornecemento que subministran as TIC) e un espazo
para o intercambio de experiencias e puntos de vista sobre o feito de
fabricar webseries. En
realidade, Interplay é hoxe por hoxe un gran escaparate de contidos
dixitais galegos, estatais e de terras tan afastadas como México,
Arxentina, Francia ou Reino Unido.
Segundo
fixo saber o Concello de Carballo (organizador do certame) na
inauguración do festival, "o Concello quere apostar polo
gris, pero non polo gris do cemento, senón neste caso pola materia
gris" e pola cultura. Na apertura, amais do concelleiro de
Promoción Económica, Xosé Regueira, tamén estiveron presentes a
directora do festival, Sonia Méndez; os padriños, Teresa Segura e
David Sainz, da serie Malviviendo;
e os convidados especiais do CIP15, Xavi Daura e Esteban Navarro de
Venga Monjas. O
alcalde de Carballo, Evencio Ferrero, subliñou no acto de
inauguración que "Carballo está limitando co mundo e estamos
encantados de que estes días o mundo limite con Carballo", nun
festival que se converte nun "espazo vivo, alegre e ilusionante"
o que xustifica, dixo, que "pague a pena seguir loitando pola
mocidade e polos novos valores".
Polo que respecta ao
programa, sinalar que abriu fogo coa estrea nocturna de dous produtos
audiovisuais: o capítulo 1x06 de Entertainment, titulado La
reunión; e a comedia Searching for Meritxell, de Burnin’’
Percebes e Venga Monjas. A xenda do venres 17 comeza ás 10.00 horas
no Fórum Carballo cunha clase mestra con Belén Santa-Olalla sobre
Webseries e Conducttr - Claves e trucos para conectar coa audiencia.
Sinalar que Conducttr é un software para crear e manter audiencia e
que “busca adquirir, activar e outorgarlle unha experiencia
diferente ao público”, explica a organización do certame, que
tamén recorda que Belén Santa-Olalla é consultora creativa de
Conducttr e ten experiencia traballando con solucións de mobilidade,
creatividade transmedia e desenvolvemento de experiencias
interactivas e de universos narrativos.
Seguindo co programa,
sinalar que o Fórum acolle ás 12.00 horas unha charla con Joan
Carles Martorell (2btube) sobre Youtubers, profesionalización e
produción de contidos no tubo tolo. O relatorio tratará en boa
medida sobre o papel da televisión tradicional a día de hoxe (como
perde público por debaixo dos 25 anos) e sobre o rol que desenvolve
neste panorama a canle YouTube (un novo prime-time cun
ecosistema profesional completamente novo). Lembrar que Joan Carles
Martorell é licenciado en Comunicación Audiovisual pola UAB.
Realizador audiovisual e produtor multimedia, ten dirixido
curtametraxes (premiadas internacionalmente), televisión e proxectos
web, ademais de ser colaborador docente en varios centros
universitarios. Xa ás 13.00 horas ten lugar a segunda edición do
coloquio aberto con creadores Vermú con CREA, un encontro
informal entre creadores froito da colaboración entre o Carballo
Interplay e CREA, a Asociación de Directores e Realizadores de
Galicia.
Xa pola noite celébrase
o InterFight: I Encontro de labazadas audiovisuais, unha
especie de regueifa entre os proxectos Malviviendo e
Venga Monjas, presentado por Enrique Lojo e Daniel Vilaverde.
Segundo informa a organización, “a través dunha serie de probas,
os contrincantes debullarán os seus vídeos favoritos de Internet,
porán a proba os seus coñecementos sobre Youtube e tentarán
devolverlle os golpes ao adversario”. Despois de cear, ás 23.00
horas, a Sala Dublín pon a nota lúdica cunha sesión
golfa con Poetarras. Recordar que Poetarras, amais
dun proxecto audiovisual e artístico é un colectivo
arterrorístico formado por Manuel Gago, Rubén Lino e Daniel
Vilaverde. Naceu en 2013 logo dunha noite de esmorga a base de licor
café e Galicolas. Os 3 mozos decidiron facerlle a competencia a
Resistencia Galega e converterse no referente da loita armada do pobo
galego, aínda que tiveran que renunciar ao traballo e á parella que
non tiñan. As súas armas son sketches e cancións, humor e
música, retranca e melodías.