Chega a nova versión de Ubuntu (a 16.04) e cun alto nivel de tradución ao galego
luns, 2 de maio do 2016
Os días pasados foi
lanzada a nova versión do
sistema aberto Ubuntu, hoxe por hoxe para moitos usuarios TIC a
principal alternativa open source (e sen dúbida unha das máis
competitivas) ás diferentes facianas de Windows. Falamos da versión
16.04 (LTS), novamente na nosa lingua grazas ao traballo do equipo
galego do UGT (Ubuntu
Galician Translators) que mantén o seu traballo de localización
nun nivel do máis salientábel, entre
os 20 primeiros do mundo, segundo lembran dende o colectivo
Trasno “por
riba de linguas coma o chinés ou o alemán cunhas comunidades de
usuarios e colaboradores moito máis numerosas”. De feito, a
nova versión está dispoñíbel en galego ao 93% . Lembrar que esta
porcentaxe atinxe tanto ao software do ambiente de escritorio coma do
novo sistema móbil.
Respecto dalgunhas das
principais novidades que achega a versión Ubuntu 16.04, sinalar que
é compatíbel con paquetes Snappy (co obxectivo de preparar o
sistema operativo para Unity 8 e para unha vindeira integración coas
ferramentas dos dispositivos móbiles, “apuntando á converxencia
de sistemas”), que está baseada en Linux Kernel 4.4 (con
asistencia de longa duración), que acubilla a versión 48 de
Chromium e a 45 de Firefox e que vén acompañado (de maneira
predeterminada) de Gnome Calendar.
Ademais, o Centro de
Software de Ubuntu desapareceu da nova entrega para dar paso a un
“máis eficaz” Gnome Software, que nos permite descargar
programas e ferramentas dunha maneira máis sinxela e áxil. Por
outra banda, as buscas en liña do panel veñen desactivadas de
maneira predeterminada (respondendo a unha chea de peticións dos
usuarios) e, ademais, a nova versión de Ubuntu vén coa suite
ofimática open source LibreOffice 5.1.