Chuza insta aos eurodeputados galegos a defender a nosa Rede fronte a Taxa Google
martes, 10 de febreiro do 2015
- Pablo Belay, membro da Asociación Chuza e desenvolvedor da súa web
A reforma
da Lei de Propiedade Intelectual aprobada o pasado mes de outubro
está a pasar factura dende a súa
entrada en vigor, tal e como se prevía, sobre todo ao habilitar unha
compensación económica
para editores de novas pola explotación no ámbito dos agregadores
daquelas
na Internet. Isto, como
lembraremos, implicou
o peche de Google News e guindou un preocupante panorama de
incerteza para plataformas
como a galega
Chuza ou Menéame, que se
ven obrigadas a pagar pola actividade dos seus usuarios compartindo
novas. Como era de agardar, as voces de rexeitamento da reforma foron
e son moitas e variadas, tanto dos usuarios e lectores dos
agregadores como dos
responsábeis das publicacións periódicas. A Asociación
Cultural Chuza! non foi unha excepción, e agora vén de pedirlle aos
eurodeputados galegos que “defendan a Rede galega e
pidan a abolición da lei actual ou a exención do pago da taxa”.
A
misiva, segundo nos conta o chuceiro Pablo Belay, foi enviada aos eurodeputados Francisco Millán (PP), José
Blanco (PSOE), Lidia Senra (AGE), Javier Couso (EU) e Ana Miranda
(BNG). Nela maniféstanse “os graves prexuízos que supón a
entrada en vigor da última revisión da Lei
de Propiedade
Intelectual
á comunidade virtual Chuza e á Rede
galega en xeral”. Segundo
explican no chamamento os responsábeis da comunidade, “Chuza é
unha
comunidade constituída
como Asociación Cultural e
ten como motivación principal dar visibilidade a blogs e páxinas
web da rede galega (usuarios, colectivos, empresas e institucións),
amosando as súas ligazóns e unha parte mínima dos seus contidos a
un público xeral e maioritariamente galego”. Ao
seu xuízo, trátase claramente dunha actividade sen arela de lucro e
sen filiación política ou partidaria algunha. De feito, din, a
comunidade
valora as ligazóns seguindo criterios de afinidade coa realidade
local e/ou cultural galega e outras culturas afíns.
O
problema, explícase, chegou coa entrada en vigor da última revisión
da LPI, tamén chamada Taxa Google. En virtude dela, a actividade de
Chuza fica suxeita “á taxación arbitraria
por parte dun organismo privado”. Ao
fío disto, dende a asociación fan saber que non é posíbel para os
seus integrantes permitírense taxación de ningún tipo, “xa
que todos os nosos esforzos tanto humanos como económicos están
enfocados a actividades sen rendemento económico”.
Para
o colectivo, está fóra de toda dúbida que a lei española está a
crear “un grave
prexuízo”,
especialmente a unha comunidade minorizada, como é o caso da galega,
que depende de webs como a
de Chuza!
para amosar
contidos e atraer público. E
engaden: “Non
estamos a vulnerar a propiedade intelectual no senso
de que non empregamos
contidos alleos co fin de lucrarnos e amais
mesmo damos
valor a contidos e produtos galegos, facilitando o seu acceso e
promovéndoos
sen contrapartida algunha”.
Por
este motivo, piden aos eurodeputados galegos que, dende a súa
posición
no Parlamento Europeo, defendan
“os intereses da Rede
galega e pidan
a abolición da lei actual ou a exención do pago da taxa para
entidades sen ánimo de lucro como a
de Chuza
en toda a Unión Europea”.