Chuza! lanza oficialmente o portal de preguntas e respostas colaborativas oQue.gal
luns, 25 de xaneiro do 2016
A Asociación Cultural
Chuza! vén de comunicar oficialmente a posta en marcha dun dos seus
novos e máis ambiciosos proxectos: o portal web de preguntas e
respostas colaborativas oQue.gal.
A iniciativa, que xa deixou atrás a fase de probas, ten
a súa orixe nos atrancos postos polo Goberno central para a
continuidade de agregadores como Chuza.org, o que alentou aos
integrantes da asociación a procurar “un novo marco” no que
desenvolver o seu traballo e compromiso coa lingua e coa información
independente. Froito desta procura é o pulo dado a oQue.gal, unha
web que salienta por amosar unha adhesión sen físgoas á cultura
colaborativa e aberta, tanto na forma coma no fondo. De feito,
apóiase integramente en ferramentas de código aberto. A intención:
ofrecer un servizo “que non existe até o de agora na Rede galega,
ben como servir de complemento a outras redes sociais xa existentes”.
Segundo nos lembran,
“trátase dun proxecto aberto a todo tipo de colaboracións da
comunidade e ás diferentes normas que se empregan na actualidade na
escrita do idioma galego”. Así, calquera usuario que acceda á web
poderá facer as súas preguntas ou respostar as doutros usuarios,
ademais de votar as mellores respostas, que serán ordenadas
segundo a valoración dos propios usuarios. Ademais, engaden, un
sistema de puntuación recompensará aqueles usuarios que a
comunidade considere máis axeitados. A supervisión dos contidos
virá da man dun grupo de administradores e moderadores.
O portal inspírase
noutras webs semellantes que xa foron quen de deixar pegada e xuntar
importantes colectivos, como por exemplo Quora ou Stack Overflow. O
software empregado en Oque.gal é Question2answer, usado tamén
noutros portais de preguntas e respostas.