Cinema, Rede e concertos inzan a terceira edición do Carballo Interplay que remata este sábado
venres, 6 de maio do 2016
O
Festival de Contidos
Dixitais Carballo Interplay chega este venres ao seu ecuador
rebordando unha chea de actividades de audiovisual, Internet e
música. O certame encetou a súa terceira edición dando acubillo a
boa parte dos profesionais galegos e estatais máis relevantes do
novo audiovisual: o audiovisual que non se concibe sen o apoio das
novas tecnoloxías para cubrir todo o elo da cadea de produción
(dende a xeración do proxecto até a rodaxe, a distribución, a
proxección, etc). Este sábado, as
twitstars
Hematocrítico e Noel Ceballos ofrecerán un podcast ao vivo e os
guionistas de Zopilote relevarán os nomes dos seus referentes
principais (que lles serviron de materia prima para “os seus
plaxios”). Ademais, o concurso de webseries
da vila bergantiñá rematará coa proxección de comedias, dramas,
animación e webseries
documentais de Nova Zelandia, Inglaterra, Canadá, Alemaña,
Arxentina e España e máis coa gala de entrega de premios conducida
pola actriz Iolanda Muíños. Pecharán o día e o Festival os
Malandrómeda, cun concerto a ritmo de hip hop.
Todas
as actividades son de acceso libre e gratuíto ata completar aforo.
Segundo
fai saber a organización, “un dos pratos fortes da xornada será o
podcast en directo das twitstars
Noel Ceballos e El Hematocrítico”, que ás 13 horas ofrecerán no
Fórum Carballo un episodio especial, en vivo e en directo, dos
Hermanos
Podcast, o seu
programa de radio por Internet aperiódico baseado na conversa libre
e caótica dos dous autores. Na súa cita co público no CIP
explicarán, cunha vídeo charla, os pasos adiante dados ao longo
destas dúas décadas en materia de audiovisual, máis polo miúdo no
eido do “video-clip post-idade de ouro da MTV”.
Arredor
do mediodía será o intre do Código Fonte Audiovisual, en palabras
da organización “un formato híbrido entre conferencia e
proxección”, no que se convida a un curator
a que seleccione e comente anacos de obras audiovisuais “embebíbeis”
que definiran a súa andaina creativa e o seu xeito de ver as cousas.
Este ano os convidados son os guionistas de Zopilote, Xosé
Castro, Andrés Mahía e Carlos Ares, responsábeis de máis de 300
libretos así como do deseño de máis dunha ducia de programas e
series de televisión, entre as que destacan Mareas
Vivas, Terra de Miranda, Pepe o Inglés, Air Galicia, O Nordés
e Era Visto.
Porén,
a xornada comezará xa antes destas actividades, ás 10.30 horas, no
Fórum de Carballo coa última mesa redonda desta edición 2016 do
festival: A
cultura popular dixital... a onde nos leva?
Noel Ceballos, El Hematocrítico, Miriam Hernánz (directora do Lab
de RTVE) e o director e realizador Andreu Meixide, moderados pola
xornalista María Yáñez, debaterán sobre o presente e o futuro da
cultura popular ligada aos novos medios e novas plataformas.
Xa
pola tarde, o Auditorio do Pazo da Cultura acollerá as últimas
proxeccións das obras finalistas da competición de webseries.
Ás 16 horas proxectaranse as últimas seis series internacionais
seleccionadas: os dramas K
Rd Stories
(de Nova Zelanda) e Emmas Welt (de
Alemania), as
comedias Whatever,
Linda (de Canadá) e
Mundillo
(de Artxenina) e a peza de animación arxentina Aventuras
de Corazón Roto.
Despois, proxectaranse as comedias Bridget
Jon de Triana, Breaking Bed, El Partido
e El Colega
Canario; o documental
ViveyLate
e a serie de animación Orfanato
Atroz. Todas elas,
españolas.
Ás
20 horas, tamén no Pazo da Cultura, chegará o momento de coñecer
as webseries
gañadoras. Será nunha divertida gala conducida pola actriz galega
Iolanda
Muíños, gañadora
do premio a mellor actriz secundaria dos Premios María Casares 2016
e coñecida polos seus traballos en cine (Crebinski
ou
Mar adentro) e
televisión (Pratos
combinados ou Pazo
de Familia).
Haberá
premio para a Mellor
webserie de imaxe real, a
Mellor webserie
de animación,
a Mellor
webserie internacional
e a Mellor webserie en
VO galego, o Premio
do Público, o Premio
CREA á mellor dirección,
o Premio AGAG ao
mellor guión e os
Premios á mellor
actriz e ao
mellor actor.
Desvelarase, tamén, o nome da proposta gañadora do Premio
ao mellor proxecto de webserie en galego,
dotado con 1.500 euros para a produción de polo menos tres capítulos
da achega audiovisual finalmente distinguida.
- O dúo Malandrómeda porá o broche final ao festival
Finalmente, xa pola noite, será a quenda do concerto do dúo galego Malandrómeda, de novo na punta de lanza da actualidade con dous LP simultáneos: Cada can que lamba o seu carallo e Os corenta oito nomes do inimigo. Será na Sala Dublín de Carballo, a partir das 23 horas. Xunto a Malandrómeda, no mesmo escenario, actuará a DJ Teresa da Praia.