Comeza na Coruña a Akademy 2015, un dos grandes acontecementos da tempada en materia de open source
xoves, 23 de xullo do 2015
O Grupo de Programadores
e Usuarios de Linux (GPUL), asentado
na Facultade de Informática da Coruña, abre hoxe mesmo as portas
dun dos grandes eventos tecnolóxicos da tempada no ámbito do
software libre galego, estatal e internacional. Trátase de Akademy
2015, unha cita que xunta na Coruña (na FIC) a desenvolvedores e
usuarios dunha das comunidades open source máis grandes de
todo o mundo, a comunidade do escritorio KDE. En total, están a
participar na xuntanza máis de douscentos expertos en software libre
de todo o mundo.
O evento desenvolverase
durante 9 días, “comezando con dúas xornadas adicadas ao
colectivo KDE de fala hispana”, nas que os asistentes darán a
coñecer os principais avances das tecnoloxías do dito escritorio,
en palabras do GPUL un dos proxectos libres máis importantes do
planeta.
Nun plano máis
específico, a cita coa presenza (entre outros expertos) de Matthias
Kirschner, actual vicepresidente da Fundación do Software Libre en
Europa, que fará o relatorio inaugural, ou Lydia Pintscher, actual
presidenta de KDE e.V.
Ao longo dos 9 días de
Akademy, trataranse temáticas do mundo da programación aberta en
xeral e de KDE en particular: falarase do novo enfoque da comunidade
KDE para decidir o seu futuro, da presentación dunha tecnoloxía que
simplifica a utilización de aplicacións Android en computadores, e
dun importante proxecto da UNESCO para o arquivado e conservación do
patrimonio cultural dixital, entre outros temas.
O evento terá varias
vertentes: a estatal (xoves 23 e venres 24), a internacional (a fin
de semana) e a práctica (do luns en adiante). A primeira vertente
(Akademy-es) dará acubillo á comunidade hispana de KDE. A fin de
semana acollerá as actividades cun cariz máis transfronteirizo. A
partir do luns 27 e até o venres 31 de xullo, o evento complétase
con obradoiros e reunións grupos de traballo.
A inauguración da parte
internacional da Akademy terá lugar o sábado 25 de xullo ás 10:00
horas no salón de actos (andar baixo) da Facultade de Informática
da Coruña (Campus de Elviña). De seguido, ás 10:15, arranca a
primeira conferencia plenaria, a cargo de Matthias Kirschner,
vicepresidente da Free Software Foundation Europe (FSFE). Esta charla
inaugural centrarase na tecnoloxía como garante e ao mesmo tempo
ameaza aos nosos dereitos e liberdades. Durante todo o sábado e o
domingo, sinala a organización, transcorrerá a parte máis
expositiva do evento, sucedéndose as principais charlas e
presentacións. O
programa pódese consultar na web da xuntanza.
Un dos relatorios do
evento, lembra GPUL, versará sobre o proxecto da UNESCO para
preservar o patrimonio cultural dixital. “A UNESCO”, recordan os
organizadores, “é consciente da importancia que ten conservar este
patrimonio e para iso encetou o Proxecto UNESCO Persist”. O
relatorio correrá a cargo de Jos van den Oever, quen participou en
varias reunións do grupo de traballo da devandita organización
internacional representando ao goberno holandés.
Outra das actividades
máis relevantes está prevista para o domingo 26, e virá da man de
Dan Leinir Turthra Jensen, que presentará o Proxecto Shashlik, unha
iniciativa que ten coma obxectivo permitir a execucións de
aplicacións desenvolvidas para o sistema Android en computadoras
persoais. Para iso, desenvolveuse unha adaptación que pode
executarse nos ditos equipos, informa GPUL, que engade que esta
adaptación intégrase no sistema e permite deste xeito o emprego de
ferramentas Android.
Akademy 2015 conta coa
colaboración da Universidade da Coruña, da AMTEGA e da Xunta de
Galicia, así como co patrocinio de empresas e entidades tecnolóxicas
como Google, The Qt company, openSUSE, Blue Systems, Igalia, KDAB,
Intel, Igalia, Red Hat, Open Invention Network (OIN), froglogic e
golem.de.
KDE, para quen non o
saiba, forma parte dos contornos de escritorio de varias das máis
importantes distribucións de software libre, como por exemplo Red
Hat, Fedora, Debian, Kubuntu, OpenSUSE, Linux Mint e FreeBSD.