Conde lembra por videoconferencia a importancia de apostarmos polas novas tecnoloxías
xoves, 11 de febreiro do 2016
Hoxe celebrouse en máis
dunha ducia de aulas da rede CeMIT, a través de videoconferencia,
unha actividade de interese empresarial dirixida a amosar as portas
ás que podemos petar no caso de querermos pór en marcha unha
iniciativa innovadora de mercado. Na
actividade de networking participou o conselleiro de Economía,
Francisco Conde, quen compartiu impresións sobre creatividade e
innovación nos negocios con 70 empresarios de 15 concellos, aos
que lembrou, dende o edificio Cersia de Santiago, a necesidade de
apostaren polas TIC para chegar á meirande cantidade posíbel de
mercado. Ademais, Conde debullou as ferramentas e apoios da
Consellería.
Conde salientou que o
seu departamento “ten activado no comezo de ano preto de 200
millóns de euros en apoios para o tecido produtivo da Comunidade, o
que supón o 70% dos programas de axudas para este 2016”. Conde
subliñou que a metade dos apoios postos en marcha céntranse na área
de Emprego, de cara a consolidar o crecemento e xerar postos de
traballo. En total, dixo, “este eido suma case 100 millóns con
liñas como a centrada no fomento do emprego autónomo, á que a
Xunta destina máis de 20 millóns”.
Segundo lembrou, o
IGAPE vén de activar programas por 22 millóns de euros que
facilitan os investimentos empresariais e iniciativas no eido da
Industria 4.0, “uns apoios aos que cabe sumar os 9,5 millóns
destinados á internacionalización do tecido empresarial, os preto
de 15 millóns para fomentar a eficiencia enerxética e o uso de
fontes renovables, e os máis de tres millóns dedicados ao smart
commerce, á modernización comercial e as vendas en liña”.
Neste marco, o titular
de Economía, Emprego e Industria avanzou que, ao longo de todo o
ano, a Consellería destinará ata 40 millóns de euros ao
emprendemento.