Contextos e a deseñadora multimedia Monica Mura impulsan Startup Pirates Ourense
martes, 22 de abril do 2014
Xa vai quedando menos tempo para o que sen dúbida é
un dos grandes acontecementos da tempada en materia de novas
iniciativas TIC achegadas dende a nosa terra. Falamos da nova edición
galega de Startup
Pirates, unha edición que nos leva a Ourense entre os días 3 e
10 de maio e que consiste basicamente nunha semana de actividades
(traballo cooperativo, adestramento, asesoramento, intercambio de
experiencias, busca de apoios, selado de pactos e alianzas, etc) para
dar forma a múltiples ideas de negocio. Por certo que o evento
Startup Pirates Ourense vén da man Patricia Díaz e María Regueira,
da Consultora de Innovación
Social Contextos e a artista italiana e deseñadora multimedia
Monica Mura. Ademais, o
encontro (aberto a tódolos ámbitos de emprendemento pero facendo
fincapé no social), conta coa apoio de empresas xa consolidadas como
Dinahosting, de Tecnópole ou da Confederación Empresarial de
Ourense.
As actividades desenvólvense nunha primeira quenda
na sede da CEO e logo na Escola de Negocios NovaCaixaGalicia da
Avenida de Pontevedra. Os emprendedores participantes accederán a
distintos premios, como por exemplo o aloxamento web Linux
profesional e o dominio asociado durante un ano que ofrece
Dinahosting, ou os 2.000 dólares de crédito que fornece Google
Cloud Platform Starter Pack.
Segundo
nos lembran estes días dende a web do CPEIG, o proxecto gañador
recibirá premios exclusivos, entre os que destaca a cesión dun
espazo de coworking, para cada un dos piratas do equipo
gañador, por tres meses e medio nas instalacións do Parque
Tecnolóxico de Galicia. Esta
cesión de balde dun espazo de traballo específico da Tecnópole
permitirá aos vencedores do certame dispor “dun espazo
privilexiado para dar corpo e impulso ás súas iniciativas
tecnolóxico-sociais”, segundo explicaron recentemente os
responsábeis do complexo empresarial de San Cibrao das Viñas
(Ourense).
Startup Pirates, como lembraremos, é un programa
internacional de aprendizaxe dunha semana de duración, de sábado a
sábado, cunha metodoloxía propia validada en diferentes países
(Portugal, Croacia, Eslovenia, Holanda, Polonia, Brasil, Perú,
Paquistán, Romanía, Bulgaria…). Trátase basicamente de que,
antes de botarnos ao mercado, verifiquemos
a nosa idea e estudemos a fondo as súas posibilidades e
potencialidades. Como dixemos, nesta edición de Ourense os
organizadores están a facer fincapé no emprendemento social. Ou
sexa, nas metodoloxías para fomentar a creación de empresas sociais
e pór en valor as ideas que solucionen retos sociais con modelos de
negocio rendíbeis e sustentábeis. Ao longo destes 8 días, informan
os impulsores do certame galego, “poderemos asistir a uns 8
obradoiros sobre modelos de negocio, comunicación, finanzas,
desenvolvemento de produtos e servizos, mercadotecnia, etc; poderemos
ser guiados por máis de 20 emprendedores, mentores e formadores;
coñeceremos a emprendedores e investidores; accederemos á súa rede
internacional de contactos; e traballaremos con outros aventureiros
piratas”.