Culturgal 2014 fará especial fincapé nas novas formas de financiamento impulsadas ao abeiro da Rede
luns, 14 de abril do 2014
A semana pasada a organización de Culturgal deu a
coñecer as datas previstas para a seguinte edición (a sétima xa)
do salón da cultura galega e, de xeito tanxencial, dunha boa parte
da nosa creatividade tecnolóxica. Culturgal
elebrase ao longo de tres xornadas, do 7 ao 7 de decembro, e
incluirá “novidades importantes como a incorporación dun espazo
dedicado á gastronomía e o establecemento dunha entrada de pago
para o público xeral”. Así, esta será a primeira vez en que se
habilite un emprazamento específico dentro do recinto feira del
Pontevedra para todo o relacionado coa nosa cociña e os nosos
produtos, piares indiscutíbeis (tamén) da nosa cultura. Haberá ao
abeiro deste espazo presentacións literarias, musicais, teatrais e
mesmo espectáculos de cociña en directo. E amosarase en detalle o que poden facer as redes e os seus sistemas pola nosa cultura en xeral.
Outra das novidades, como dixemos, radica na
metodoloxía elixida para recadar fondos: a elección do método de
pago. Deste xeito, cada visitante adulto deberá aboar unha entrada
de 2 euros para acceder á feira, un prezo que será de 1 euro para
os cativos. Este tipo de medidas son unha resposta urxente á caída
progresiva e continua de apoios públicos para o salón, ao que
cómpre engadir os efectos que a crise económica tamén está a
provocar no noso sector cultural e creativo.
Por outra banda, e seguindo este fío de
metodoloxías para convocar o apoio directo da cidadanía, esta
vindeira edición de Culturgal semella que será unha edición moi
centrada no crowdfounding,
que, como saberemos, é unha técnica cada vez máis espallada, con
fondas raizames nas redes, dirixida a favorecer o achado de mecenas
en liña, pequenos investidores e produtores, para todo tipo de
proxectos culturais que doutro xeito ficarían para sempre no limbo
da idea (e non da plasmación nunha realidade). Neste senso, a
directiva do Culturgal, cuxa presidencia ocupa desde principios de
ano o presidente da Asociación Galega de Editores, Manuel Bragado,
avanza que na edición de 203 xa entraron con forza estas liñas de
traballo no ámbito cultural (crowdfounding,
cooperativismo e emprendemento na contorna rural), e todo indica a
que centrarán boa parte as actividades na seguinte entrega da feira
cultural. Segundo avanzan os responsábeis do salón, “en 2014
Culturgal quere seguir sendo reflexo das novas formas de operar na
cultura, ademais de escenario de estreas e novos proxectos como vén
sendo habitual”.
Lembrar que o programa xeral 2013 contou con 151
actividades: espectáculos infantís e teatrais, presentacións de
libros e plataformas tecnolóxicas, concertos, cinema e webseries,
etc, ás que sumar todas as xeradas polos propios expositores. As
convocatorias 2014 para solicitar stand e presentar propostas de
actividades abriranse antes do verán.
Culturgal 2014 procura ademais novos patrocinios. Na
actualidade a Feira conta con dous importantes apoios: o da Xunta de
Galicia e o do concello de Pontevedra. Así mesmo conta coa
colaboración da Deputación de Pontevedra a través da imprenta
provincial. En 2012 e 2013 o Ministerio de Cultura contribuíu á
organización da Feira con 25.000 euros, partida que non se mantén
ao estar limitada a dúas anualidades. Neste momento xa se puxeron en
marcha encontros e conversas con diversas empresas galegas co ánimo
de que sexan parte do Culturgal.