Deputación, Caixa Rural e CEL renovan o seu apoio á transferencia de tecnoloxía no Campus de Lugo
luns, 23 de novembro do 2015
O Centro de Innovación e Transferencia de
Tecnoloxía (CITT) do Campus de Lugo recibiu novos azos para a súa
andaina futura. Os apoios veñen da man da Deputación de Lugo, da
Caixa Rural Galega, da propia Universidade de Santiago (da que forma
parte o campus lugués) e da Fundación CEL. Todas
estas entidades anovaron o convenio común para o financiamento do
CITT, dotado con 60.000 euros. Así se fixo saber a semana pasada
no acto de sinatura de renovación dos acordos. Na cita, o reitor
Juan Viaño deu a coñecer que o centro xestionou durante o trienio
2012-2014 fondos por un importe total de 15 millóns de euros para o
desenvolvemento de proxectos de investigación, actividades
formativas e outras actuacións. O reitor tamén salientou que o
balance de captación de fondos por parte durante o último trienio
depara un medre do 9% na captación de recursos de I+D+i respecto do
trienio 2011-2013.
“Estes resultados constitúen un indicador
claramente positivo”, dixo o reitor da USC antes de proceder á
sinatura da renovación do convenio, un acto no que tamén
participaron o presidente en funcións de Caixa Rural Galega, Manuel
Varela; a deputada provincial María Loureiro e o secretario xeral da
CEL, Jaime López.
Segundo lembrou Viaño, “o Centro de Innovación e
Transferencia de Tecnoloxía da USC é un piar básico nos cometidos
de I+D+i impulsados e desenvolvidos no Campus de Lugo, tal e como o
corroboran as 216 actividades xestionadas por este órgano”, ao
engadiu que os fondos captados e xestionados polo CITT tamén fixeron
posíbel a contratación de 13 persoas con cargo a convocatorias de
concorrencia competitiva e outras 130 persoas con cargo a outros
proxectos e actividades de investigación.
Pola súa banda, o presidente en funcións de Caixa
Rural Galega, Manuel Varela, destacou o alto grao de satisfacción
que supón para Caixa Rural Galega “poder contribuír ao
desenvolvemento do I+D+i en Galicia a través deste convenio coa
USC”, ao tempo que expresou a firme vontade da entidade que preside
por dar continuidade no futuro a esta colaboración.
A deputada provincial delegada das áreas de Ensino,
Educación, Economía do Coñecemento, Igualdade e Mocidades, María
Loureiro García, salientou que “esta iniciativa, que conta cunha
achega por parte da Deputación Provincial de Lugo de preto de 10.000
euros, complementa a moitas outras que impulsamos coa USC, como é,
por exemplo, o Plan de Choque a prol do Campus”. Loureiro engadiu
que ao abeiro das 13 medidas que contempla este Plan, hai iniciativas
de pulo á investigación, á divulgación científica e á captación
de talento, entre outros ámbitos. Loureiro reiterou asemade “a
total colaboración e dispoñibilidade da Deputación neste tipo de
proxectos, que serven para situar á nosa provincia no lugar que lle
corresponde”.